L Istitut Ladin "Cesa de Jan" prejenteia sia pruma publicazion 

Ai 16 de auril, da les 17.00 tl salf dles scoles vedles elementares a La Plie de Fodom - Autoura é Brigitte Rührlinger 

Ence trueps vips storj pro

L diretour dl Museum Ladin Ciastel de Tor, Stefan Planker, dij de ester dret content dla bona colaborazion con i consorzes turistics che ti dá ence valour y peis a la cultura ladina

Enier, juebia ai 31 de merz 2005, à l Museum Ladin abù coche vijitadoura una dles persones dl spetacul plu conesciudes dl moment tla Talia: Michelle Hunziker. Adum a sie compagn y sia muta Aurora é i ghesc' restés per does ores tl museum, desmostran truep interes per la storia y la cultura ladina. L argoment de chel che ai é restés particolarmenter imprescionés é sté chel dla formazion dles Dolomites. Dal moment che l Museum Ladin ti à plajù dassen, se ái declaré de vegnì a San Martin a vijité l museum ciamò n iade entant l’isté.

Michelle Hunziker, deberieda con sie compagn y sia muta Aurora y amesaite l diretour, Stefan Planker.

L ensegnament dl ladin a l'université

Enier á doi studenc sclut ju  l ejam de laurea con 110 y lauda: Bruno Senoner con n laour sun "l'alfabetisazion tles scoles de Gherdeina" y Edith Senoner con "l ensegnament dla storia locala tles scoles elementares"

Al articul sun les lezions dl prof. Paul Videsott pro la Université de Persenon publiché sibe sun Noeles.net (13.03.2005) che tl foliet  ”Alto Adige” él da enjonté che al ne é samben nia les soules ativités a ben dl lingaz ladin dla sezion ladina, desche l diretour de repartizion dr. Theodor Rifesser nes spliga.  Dlongia l prof. Videsott ensegna tl secont semester ence l prof. Hans Goebl dl'université da Salzburg (con n volum dl ALD/Atlant linguistich Ladin tles mans) che ti sporj a chi dl prum y secont ann na panoramica ampla sun l svilup dla rejoneda ladina pian via dai Romans y ruvan enchin a nosc temps. Enier él sté dí de ejam a l'université, doi candidac, Bruno Senoner y Edith Senoner de Santa Cristina, á sclut ju con 110 y lauda.

I ombolc dess declaré sies intenzions sun la lege 482/99, zenza ne ései nia legitimés

Aladò dla Svp é demé i ombolc lités democraticamenter i raprejentanc autorisés da crié n comité interladin aldò dles desposizions dla lege nazionala 482/99 - I candidac da ombolt aud perchel sen dant les lites de declaré sia posizion ofizialmenter

Al é i ultims dis per prejenté les listes di candidac da ombolt y di aconsiadours. Ala se trata de chirì fora i miours aministradours di dinés publics y con la majera sensibelté per i problems soziai dla comunité. La jent se aoda aministradours a chi che an pò ti jì permez te vigni moment zenza poura y con la speranza de giaté n aiut, n consei senzier y nia de pert. La politica à sia importanza, ma la "polis" (comunité) é valch soura la democrazia. La democrazia é souradut frut dl juech di partis, entratant che la "polis" defen i confins dla comunité, sia strutura legala, si derc zivics, sia autonomia, sia etnia. De chest vers fálela ciamò sterch pro i ladins: unis da la natura ("polis"), ma despartis da la politica.

La lege 482/99 veid dantfora la poscibelté de mete su organisms de coordinament reconescius istituzionalmenter, sce mendranzes é spedicedes sun deplù provinzies o regions. La lege alogheia ence finanziamenc per projec.

Na lingia de manifestazions enfin a la fin dl ann

De mei conzert con Sabina Willeit, de otober esposizion "Vejin", de november teater

La Consulta Ladina dl Comun de Bulsan organiseia vigni ann na lignora de manifestazions per i Ladins aciasés tla zité y ence de sensibilisazion envers i convejins talians y todesc. Chest ann á sies ativités culturales bele metù man con n conzert de mujiga moderna con i grups "Acajo" y Jean Daniel Granruaz tl salf dla Carambolage ai 9 de merz (ciala fotos tla galeria), dant a n salf toch y plen de jent. Ala jirà defata inant con na seira de leteratura ladina che veid alapert Brunamaria Dal Lago Veneri, Ingrid Runggaldier, Maria Pedevilla y Marta Rungger ai 13 de auril, da les 20.30 tl "Circolo Cittadino" tla Streda Grappoli/Weintraubengasse, 2. De mei conzert classich con la ciantarina Sabine Willeit.

Soziolinguistica dl Ladin a livel universitar

Les lezions vegn tegnides dal prof.univ. Dr. Paul Videsott, una na lezion a l'edema enfin a jugn - Ence nia-studenc pò tó pert

Tla facolté dles scienzes dla formazion dl'Université de Bulsan te sia sezion a Persenon peiel via  en venders, ai 18 de merz 2005, l curs de ladin de chest ann tl cheder dl ensegnament universitar dles scienzes dla formazion.  L professour dr. Paul Videsott dl'université da Dispruch vegn a traté te 13 lezions les chestions soziolinguistiches plu importantes dl raion retoroman (pian via da la situazion di Ladins dles Dolomites) desche l'adoranza dl lingaz te n contest privat, tl'aministrazion publica, te gliejia y e.i. Al  vegnirá ence analisé la problematica dla normazion y dla standardisazion dl ladin che é lieda diretamenter a l'adoranza dl lingaz a livel scrit. Ai cursc pò tó pert ence nia-studenc interessés.

N salf toch y plen per i Acajo y Jean Daniel & band

N stil musical internazional pò jí dret ben a una con l lingaz ladin - Bela la prejentazion de Rut Bernardi

"Ert moderna ladina" o cultura dal aut

I fruc dl concurs dal aut crieia plulere delujions ti vijitadours - la soula ousc che lauda é l Ofize stampa dla provinzia 

de Umbert Cians

Stimé assessour Mussner, se mené picé di artisc’ é n bon sentiment, ma pertene che vigni novité sie ert, y ert da mostré publicamenter con i scioldi dl “Lond”, chest va n puech soura la compascion normala fora. Da tres él gnù dit che na bona pert de cie che an miena ert é n “nescio quid”, y tl caje dla mostra tla galaria Prisma de Bulsan se tratova propi, aldò di vijitadours, de na cossa nia da capì. “Flus d’aisciuda”, les operes d’ert di artisc’ ladins joegn pér propi seces, menedes entourn dal vent. Chesta l’imprescion ch’an à abù vijitan la mostra “videodigital” tla galaria d’ert Prisma de Bulsan. La mostra dess raprejenté l prum pest de promozion di joegn artisc’ ladins organisé dal assessorat a la cultura ladina. Cater, cinch fotos animedes, metudes en moviment da aparac eletronics.

David Lardschneider é l prum diretour dla Generela 

Chisc dis s'á abiné l Consei diretif dla Generela per sourandé les enciaries - Concurs dla Union Generela y dla Maratona dles Dolomites

I Ladins met man da colonisé l "planet internet"

Tres la rei végnel pité informazions, servisc y aorela curta - Aluesc ence forums - Sic istituzionai desche la Comunité de val y l ospedal sbaufeia l ladin

I ladins met man da colonisé l "planet" internet. Tres deplú unions, mo ence impreises sent l debujegn de se prejenté y de ester interatifs sun internet, mostran sies ativités tres test y fotos. I sitesc da la Val Badia é metus ju naturalmenter tl lingaz ladin canche l rai de interes é dantaldut local. Te Gherdeina se múdela. Chilò é les plates internet scialdi bilinghes o trilinghes, datrai demé per todesch, ma ales deventa plu "ladines" envers a denant. A pert en valgunes ezezions pòn vedei che i privac vá dantfora, depierpul che les istituzions zotoreia do.

Na tofla spliga l monument a la "Vitoria" 

Enier él vegnú destopé ofizialmenter les tofles che dess storizisé l monument dla "Vitoria" a Bulsan, ence per ladin (standard) 

"Chest monument é vegnú metú su entratant l regim fascist per zelebré la vitoria dla Talia tla Pruma Vera Mondiala. Ala á amarscé l destacament dl Tirol y la separazion dla populazion de chesta tera da sia patria austriaca. La zité de Bulsan, ledia y democratica, condaneia les despartizions y les descriminazions dl passé y vigni forma de nazionalism, se tolan dant de promueve con spirit europeich la cultura dla pesc y dla fradaia. 1926-1928 / 2004".  Per cie che reverda l ladin, él da noté che l test é te ladin standard.