|  |
Reforma sanitara te Sudtirol: na seira de informazion dl MPL Ladins
|
|
La reforma sanitara, nia dagnora a ben dl pazient
L pazient dess podei cerne te cie strutura sanitara che al vuel vegnì medié, ence fora de Sudtirol
I reladours dla seira é stés: l dot. Florian Zerzer, cef-departiment dl Assessorat a la Sanité dla Provinzia Autonoma da Bulsan , che à rejoné sun la tematica dl'organisazion y dl'aministrazion dla sanité te Sudtirol. La funzionalité y la cualité di servisc sanitars de ospedal é vegnuda trateda dal primar dla repartizion de reanimazion y anestesia dl ospedal da Bornech, dot. Marco Pizzinini, d' Al Plan de Mareo. N auter argoment enteressant é spo sté chel di debujegns y dles poscibeltés de svilup dl raion sanitar. Inant ésen jus con l referat de Fiung Franz che é ju ite sun l tema: l personal dla Azienda Sanitara, condizions y ghiranzes per ti ofrì n bon servisc a la jent. A scluje ju la seira de formazion y informazion él ciamò sté Renato Paratscha y Roland Thaler, che à porté dant sies esperienzes dal pont de veduda dl pazient.
Sanité: n argoment che enteresseia dagnora.
|
Les alergies al stuep dla flour
|
|
Aisciuda, temp plen de stuep dla flour tl'aria
Chi che patesc l'alergia sà cie gran desturbs che al comporta - I anti-istaminics vegn dal prum de merz 2004 paiés da la Cassa Malatia - Medié adorassé per prevegnì astma
Per conesce les gaujes de na alergia al stuep dla flour val debujegn de conesce les plantes y si temps de impolinazion. Truepes plantes se deslergia, davia che ales ne à nia de gran ciofs per tré adalerch eves y insec, tres de gran cuantités de stuep dla flour che vegn straportedes dal vent te n rai enfin a 400 km. Dantaldut dai legns da fueia desche dai bedois, dai alnis, da les nojeres y e.i. peiel via nioles de stuep dla flour da d'aisciuda, meisc temus dai alergics. Al vegn ence desconsié de mangé produc che contegn stuep dla flour, desche la miel. I desturbs: dut l dì stranidlé, brujour ai uedli y se mocé.
|
Curs de spezialisazion tl setour sozial
|
|
Curs per emparé a guerné jent atempeda
Tecniches de guern ai amalés, medejina y pratica te 100 ores
L curs per emparé a secodì persones tl ciamp sozial é de 100 ores. Te 32 ores vegniràl ensegné tecniches de guern ai amalés, te d'autres 32 ores conescenzes emportantes tl ciamp dla medejina y spo él ciamò vedù dantfora 36 ores per fé pratica. Chest curs é pensé per assistenc soziai y chi che ti fej l guern a jent atempeda, che à arjont l diplom de jugn 1999 y che giatassa enscì na cualifica d'enjonta. L primar vedl dl labor de analisa dl ospedal de Bulsan, Umberto Gaspa y l infermier Roberto Bergo tegn l curs.
|
Dal ofize per l svilup dl personal dl setour sozial
|
|
Curs per colaboradours / colaboradoures di servisc soziai
Con l moto „se capì per laoré miec deberieda“ met l servisc per l svilup dl personal a jì n curs per educadoures / educadours y colaboradoures / colaboradours di servisc soziai.
(osp) Chest curs che met man de fauré tla Haselburg a Bulsan, vegnirà tegnì te cater pertes de mez n di. L fin dl curs tla rejoneda taliana é chel de mostré su manieres per conscidré enstesc miec sies capazités y de mioré la colaborazion y la comunicazion con i compagns de laour. Fora da la analisa de cie che porta al stres vegniràl ence emparé a conesce l training autogen do J.H. Schultz. L curs che pieta lerch enchin a 15 persones vegn tegnì ai 5 de fauré, ai 5 de merz, ai 23 de auril y ai 28 de mei, for da les 9.00 enchin a les 13.00. Referent é Guido Carriero, psicologh y dozent tla université ledia de Bulsan.
|
La vila Delug per amalés psichics
|
|
Amalés psichics: zenter de terapia per malaties multiples
Via libera per l finanziament y la projetazion dl comples.
(osp)Na strutura publica vegnirà enjigneda ite a Oberin per pazienc con malaties psichiches y tl medem temp con malaties da dependenzes. La vila "Delug" vegn per chest fin saneda da pert dla aministrazion provinziala y adateda a les normes de lege. Con l'aprovazion dl plan per anuzé chesta cubatura él vegnù dé l via libera per l finanziament y la projetazion dl comples.
Enscì végnel fat n vare inant tla rei dla assisteza psichiatrica te Südtirol: na strutura publica de terapia per pazienc con diagnoses multiples - donca persones che ne patesc nia demé per gauja de na malatia psichica, ma che patesc ence per gauja de malaties da dependenzes . Do la restruturazion dl comples y i adatamec a les normes de lege contra l meldefuech y a les normes per handicapés déssel vegnì tout su per entratant 20 pazienc.
|
Segureza sun l post de laour
|
|
Seminar: "i esperc dla segureza sun l post de laour"
Na iniziativa metuda a jì dal Assessorat a la formazion profescionala per l lingaz talian.
(osp) En mertesc ai 16 de setember vegniràl pité da les 17,00 a les 20,00 tl auditorium dl zenter de formazion profescional tla streda S. Geltrude,3 a Bulsan n seminar con chest titul: “i esperc per la segureza sun l post de laour”. Do n curt salut da pert dla assessoura a la formazion profescionala, laour y scola taliana, él prevedù i intervenc de Barbara Repetto Visentini, diretoura dla Repartizion formazion profescionala per l lingaz talian dal titul "La Provinzia autonoma de Bulsan y la formazion di esperc dla segureza",de Francesco Sbetti, archiridour dla Sozieté "Sistema Snc" de Aunejia sun "criteres per la realizazion dla archirida sun i esperc dla segureza tla Provinzia de Bulsan", de Franco Maiari, coordinadour dles ativités formatives per la segureza sun l laour "Da la archirida sun i esperc envers na regolamentazion nueva baseda sun la formazion y sun la zertificazion dles competenzes".
|
Servisc per la formazion dl personal
|
|
Curs: motivazion y cualité tl laour sozial
Poscibeltés de svilupé "motivazion y cualité"

(if) A duc i colaboradours dl ciamp sozial che volessa mesuré la cualité y la motivazion te sie laour ti végnel pité ai 2 y 3 de otober 2003 a Persenon n curs da pert dl servisc provinzial per la formazion dl personal. I interessés pò ciamò se anunzié enchin ai 2 de setember 2003, chest lascia alsavei l ofize competent. L curs "motivazion y cualité tl servisc sozial" é pensé dantaldut per colaboradours che laora a temp plen, ma ence a volentars tl ciamp sozial. I partezipanc al curs empara a pensé do a sia motivazion te sie laour. Al ti vegn sclarì la relazion anter motivazion y cualité dl laour. Tl curs végnel souraprò ence medité sun les poscibeltés de svilupé "motivazion y cualité". Referent é Frank Frese che é dozent tla scola auta de Solothurn tl nord ovest dla Svizra y consulent lede de formazion. L curs vegn tegnì en juebia ai 2 y ai 3 de otober 2003 tl Jugendhaus "Kassianeum", Brunogasse 2, a Persenon.
|
Sanité: assegurazion per l guern
|
|
L projet „assegurazion per l guern“ te internet
Dut cie che é interessant da savei sun l projet „assegurazion per l guern“ te Südtirol é da sen inant da abiné ence te internet.
Do che an à bele publiché y spartì fora l codejel (brosciura) de informazion dal titul „Gutes Gefühl - Die Pflegeversicherung des Landes Südtirol“, (samben demé per todesch y talian, i ladins ne esisteia nia tla provinzia dles mendranzes, n.d.r.) pò sen la jent ence cialé do plu avisa duc i particolars sun chest projet tles plates dla rei zivica (www.provinz.bz.it/pflegeversicherung). An giata na lingia de domandes-respostes a argomenc desvalifs: dert a l'assistenza, prestazions asseguratives, assegns de prestazions de guern, grovaries, esenzions y contribuc de oblianza y e.i.. Al é ence prevedù la poscibelté de dejciarié ju la brosciura entiera.

|
|  |
|