benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Noeles.net - Informazion ladina: Ladin Standard

Chirí te chest tema:   
[ Endò a la pruma plata | Cernede n tema nuef ]

Coretour Ortografich: co l adoré
Ladin Standard

 

I varesc per instalé l coretour ortografich

Al funzioneia pro dutes les verscions de MS-Word - La ativazion ne vegn nia fata sot la ousc "ladino", ma "Rhaeto-Romanic"

(if) Trueps ne se à nia entopé, do avei des-ciarié ju l coretour ortografich per l Ladin Standard, de l ativé y nes à damané do aiut. I tolon la ocajion per dé n valgunes spligazions: la prozedura de instalazion é automatica. Al basta cliché sun "setup.exe" y l dizionar standard per l program Microsoft-Word peia via. L coretour ne é nia n program che an pò anuzé a pert, ma demé al intern de Word. L vare plu emportant per anuzé l coretour é chel de dì a Word che l test che an scriv é ladin standard/dolomitan. Per fé chest méssen cerne tl menù - "Strumenc ---> lingaz --->  "Rhaeto-Romanic" y nia "ladino" che fossa l iudeo-spanich. 



metù ite da noeles ai 29 January 2004 da les 18:20:31 (1265 liet)
(liej inant... | 2098 letres | comentars? | ponc: )


MANIFEST LADINIA 2005 va inant
Ladin Standard

 

La scienza linguistica dij de scì, la politica pesima

La chestion dl lingaz é na cossa che ti envel a vignun - La azion de sotescrizion va inant enfin al 2005

L'elaborazion de n lingaz scrit ladin unitar se à giaté bendebot de arfereda do la delibera di 27 de jené 2003 dl assessour provinzial Florian Mussner. Al à praticamenter sclut fora chesta forma scrita da l'ofizialité tla provinzia de Bulsan. Na delibera che ne jiva daldut nia debujegn y che é demé vegnuda ideeda per chesta funzion, condutes les autres spligazions y vertoles entournvia. Con chesta situazion giuridica che respiedla ence la impostazion politica él dassen vegnù metù comprometù l avanzament saren dl projet de n lingaz scrit unitar che veid dutes les unversités, les istanzes linguistiches y culturales che meina do y la politica depierpul che arfera, Istitut Ladin Micurà de Rü (MdR) anterite, ma che a la fin mess "olghé" a la politica, desche sie arat a la delibera souradita à desmostré (dut l Consei a una!). Al é cler che l impuls, la vijion te chesta chestion mess dantaldut ence vegnì dal aut, al mess vegnì popularisé anter la jent da la politica, da les istituzions de dovei. Al scomenciament fòvel propi l Istitut Ladin Micurà de Rü con a cef enlaouta l diretour Dr. Lois Craffonara, na persona con vijions y gran savei tl ciamp linguistich, che ova aplané l troi dantfora y ova metù a brodolé, per la pruma outa, la pera lingaz scrit unitar, Ladin Dolomitan o Ladin Standard (LS) desche al vegn nominé aldidancuei. L obietif che an vuel arjonje empera é scempliscim: avei n pont de referiment linguistich unitar ence per i idioms, sauridé empera la comunicazion interladina, se mostré linguisticamenter deforavia unis y enfortì les poscibeltés de souravivenza.  


metù ite da noeles ai 07 December 2003 da les 12:17:31 (1383 liet)
(liej inant... | 4687 letres | comentars? | ponc: )


Spell, do passa diesc agn de laour
Ladin Standard

 

"L standard ne é nia valch de nuef, ma peia via dai idioms"

Intervent de dr. Nadia Chiocchetti, romanista, enseira tl Josefssaal a Bulsan

Bona seira a vosautri duc canc che i seis vegnus a scuté chesta prejentazion. Do da la GLS (gramatica dl ladin standard), prejenteda te chest medem salf dant da 2 agn végnel sen prejenté ence l Dizionar dl Ladin standard y siei indesc de referiment dal talian y dal todesch. Perdret é l DLS (dizionar dl ladin standard) vegnù fora bele l ann passé y à abù sia pruma curta prejentazion a Urtijei entratant l convegn metù a jì dal SPELL y dal CELE; enlaouta fòvel prejent dantaldut jent che tolova pert al convegn y perchel tolonse sen chesta ocajion per l fé conesce miec al publich ladin, plu diretamenter enteressé a la opera. Emplù él ensnuet ence la novité di indesc, che vegn giusta fora de stamparia y che raprejenteia, sciche i vedaron, n strument dret de utl per anuzé deplen y saurì l DLS mioran enscì la conescenza dl ladin standard. Ma jon damprovia.


metù ite da noeles ai 02 December 2003 da les 10:44:50 (1159 liet)
(liej inant... | 10042 letres | comentars? | ponc: )


Seira d'informazion soura l LS
Ladin Standard

 

Tla provinzia da Bulsan él n boicot

Erwin Valentini: "Les istituzions messessa avei deplù trasparenza y prejenté si programs publicamenter" - Rut Bernardi: "Important él sen scrive truep per Ladin Dolomitan/Standard, al volessa ester n Harry Potter per Ladin Dolomitan" - Vittorio Dell'Acquila: "L LS é demé n'autra maniera de scrive ladin"

Sun envit dla Comunanza Ladina à Bulsan él vegnù tegnì enseira n'enconteda de informazion soura i laours fac dal projet SPELL te chisc ultims agn y les prospetives per l davegnì. I laours pò se lascé vedei. Dl 2001 fòvel vegnù prejenté la gramatica, dl 2002 l dizionar y sen dl 2003 él vegnù metù sun meisa valgunes d'autres "scincundes": l indesc talian-LS y todesch-LS, l coretour ortografich y l Dizionar dl Ladin Standard on-line. Sen ésen tl laour de laoré inant pro l vocabular y sun ciamps spezifics, vedus dantfora é desvalifs glossars setoriai: botanica, medejina, architetura y e.i. L strumentar per scrive ladin é naouta dantman. "L lingaz scrit unitar é dantman, ma les valedes ladines é spedicedes, nia demé con confins politics, ma dantaldut da confins psicologics cherscius ti cerviei", à dit Erwin Valentini l atual president en ciaria dl projet SPELL. En vender che vegn vegniràl tegnì l'enconteda con l Istitut Ladin Micurà de Rü per vedei, sce al é ciamò valch che an pò fé deberieda. La meisa di reladours tl Josefsaal dla Ciasa Kolping a Bulsan, da manciancia: Erwin Valentini, Rasom Sabrina, Nadia Chiocchetti y Vittorio Dell'Acquila.


metù ite da noeles ai 02 December 2003 da les 01:23:17 (1197 liet)
(liej inant... | 5601 letres | comentars? | ponc: )


L Ladin Standard y sia adoranza
Ladin Standard

 

Con l Ladin Standard pò i Ladins desmostré colaborazion anter ei

Les dolies da nasce dl Ladin Standard - Tost tegnirà les istituzions portadoures na enconteda

de Lois Trebo/aconsiadour tl Istitut MdR
 
Do che  i rumanc dl Grijon fova dal 1982 piés via con nia de piceres dificoltés con sie lingaz de scritura - l rumanc grijon - laoré fora sun la proposta dl prof. de Turic Heinrich Schmid, fova chest scienzié dl 1987 vegnù enciarié dal Istitut Ladin " Micurà de Rü" y dal Istitut de Fascia de studié fora ence per i Ladins dles Dolomites na sort de lingaz unifiché. Sun sia proposta arateda dret positiva à la Union Generela adum con l Istitut Cultural de Fascia envié via l projet Spell (= Servisc de Planificazion y Elaborazion dl Lingaz Ladin) dl 1994 che à abù plu dolies da nasce. Sun l retrat: l prof. universitar Heinrich Schmid, pere dl Ladin Standard y dl Rumantsch Grischun (1921-1999)

metù ite da noeles ai 01 December 2003 da les 11:10:37 (830 liet)
(liej inant... | 5742 letres | comentars? | ponc: )


L SPELL ruva sun la glacia
Ladin Standard

 

L projet de n lingaz scrit unitar ruva te na fasa critica

Problems de direzion dl projet - Sce al ne vegnirà nia giaté n troi deberieda, jirà bonamenter vignun do sie troi - Bel fòssel entratant de audì les minonghes de jent n puech fora dles istituzions: nuzadours, opinion leaders

L problem con Spell à bele metù man l ann passé, nia demé con la delibera y l arat de esclujion dl LS da pert dl Istitut Micurà de Rü (MdR). De setember 2002 fòvel vegnù enjigné ca n program per l 2003 y soura fora che ti fova vegnù porté dant al Comité Tecnich dl SPELL. Te chela ocajion fova l diretour dl Istitut Ladin MdR, Leander Moroder, dla minonga che al ne jiva nia plu debujegn de n diretour independent, che i enc convenzionés dess sourantò a rotazion la direzion y che al fossa sté eventualmenter a desposizion per fé l diretour.


metù ite da noeles ai 16 November 2003 da les 01:54:58 (1033 liet)
(liej inant... | 8384 letres | comentars? | ponc: )


10 agn de SPELL vegn prejentés a Bulsan
Ladin Standard

 

SPELL, resultac y prospetives do 10 agn

Ai 1 de dezember 2003 da les 20.00 tl Josefsaal dla Ciasa Kolping con prejentazion de "Letres te n fol" de Rut Bernardi

(if) La Comunanza Ladina envieia decuermenter a la prejentazion dl Dizionar dl Ladin Standard y de d'autri laours dl grup de laour SPELL. Te chesta ocajion prejentarà l'autoura Rut Bernardi ence sie liber nuef "Letres te n fol", metù ju per LS. La seira dedicheda al SPELL veid dantfora chisc temesc: 10 agn de SPELL, resultac y prospetives da pert dl dot. Erwin Valentini, dedò vegniràl prejenté l Dizionar dl Ladin Standard (DLS): indesc IT-LS y DE-LS da pert dl dot. Vittorio dell'Aquila. Te n "intermezzo leterar" prejentarà Rut Bernardi sie liber "Letres te n fol". Ala jirà inant con la prejentazion dl prototip de coretour ortografich SPELLchecker da pert de Sabrina Rasom y Claudio Giuliani y enultima vegniràl fat na desmostrazion dl ambient lessicografich per l ladin standard da pert de Claudio Giuliani.


metù ite da noeles ai 14 November 2003 da les 15:15:04 (1269 liet)
(liej inant... | 2327 letres | comentars? | ponc: )


Dizionar dl SPELL sen ence on-line
Ladin Standard

 

Dizionar dl Ladin Standard sen ence on-line

Chisc dis él vegnù ciarié on-line l Dizionar dl Ladin Standard da consulté pian via da duc i idioms ladins, todesch y talian con les corespondenzes tl standard - Novité: i sinonims vegn tamben dés dant

Dant da puech él ju on-line ence l dizionar dl ladin standard a la miscion http://dls.smallcodes.org/ (enjontede chest liam a vosc "preferis"!). Con chest strument végnel fat n auter vare inant per slesiré la adoranza dl ladin standardisé. L dizionar pò vegnì consulté pian via da un di 5 idioms ladins (badiot-marou, gherdeina, fascian, fodom y ampezan), plu samben talian y todesch. Na sauridanza che an à demé con l sistem eletronich. Chest vuel dì che dan ite na parola per gherdeina végnel atira giaté la corespondenza "standardiseda". L coretour ortografich che an preveid de ruvé per la fin dl ann sarà l proscim vare.


metù ite da noeles ai 13 November 2003 da les 17:07:38 (1275 liet)
(liej inant... | 6824 letres | 1 comentars | ponc: )


Ladin Standard: la polemica va inant
Ladin Standard
 

Per valch diretour é l Ladin Standard "massa talian"

Les vertoles contra l ladin Standard é tres les medemes: "massa talian", "massa fascian"

(i.o.) Ti ultims temps auden aboc che al vegn dit che l ladin standard sie massa "talian", che an mess fé mudazions per che al vegne azeté y chel nia da jent per streda, ma - gran marevueia - da persones con enciaries da diretour te Istituc ladins y plu avisa da persones de Gherdeina. Ester massa "davejin/damprò" dal talian y bonamenter massa "dalonc" dal todesch ti fej do l mote n spavent nia da creie a valgugn, che al ti va demé n tel glai ju per l spinel.  "Al é massa talian", o ence "massa fascian", végnel dit, ma al ne vegn nia dit avisa olà, cie? Al ne é nia cler, sce an vuel demé descredité o avei na vertola bonmarcé per desbuté dut cant. Mussner, l assessour a la cultura ladina tla provinzia de Bulsan, à almanco dit de ester decontra "te vigni caje nia mudé per i autri, ajache i fascians vuel, chest ne veidi nia ite". Logo sun sit dl LS: http://www.spell-termles.ladinia.net/.

metù ite da noeles ai 11 November 2003 da les 20:50:29 (1234 liet)
(liej inant... | 5350 letres | 2 comentars | ponc: )


Proposta: vocabolar per talian/ladin standard
Ladin Standard

 

Vocabolars dessourora

L ladin standard auda da vegnì tout ca cotant deplù che enchin a sen - I vocabulars talian-ladin dess ester empruma te ladin standard

de Lois Trebo

(if) Nia duc i ladins ne pò bravé de avei encuei scialdi trueps de bogn y de biei libri ladins per les scoles de oblianza (per la scola auta vuelel ciamò ester nia demé de pici sforc) y per duc chi che vuel se dé ju con l ladin, con l lingaz dla oma con sia cultura y sia storia. Al n'é nia tant giut ca che al é vegnù publiché gramatiches y vocabolars ladins de gran valuta. Trueps aspetova ert a giaté tles mans les publicazions tal ladin standard - tamben la Gramatica (GLS) che l Dizionar (DLS) ; enscì pò duc se fé na idea plu clera coche chest lingaz unitar o unifiché é metù adum y co che al sona tla oredla ladina. Pro les publicazions tl ladin standard souradites vuelel zenzauter ciamò ester n valgunes publicazions de carater leterar; chestes vegnirà tantost dedes fora da les cater istituzions che porta/sostegn l projet Spell che à laoré fora l ladin unifiché; chisc laours portarà dant stories, noeles, rimes, teatri, conties y liejendes. Da deplù de tel laours pò l letour se concretisé na idea plu clera sun l' azetanza de chest lingaz unitar.


metù ite da noeles ai 29 September 2003 da les 12:26:14 (991 liet)
(liej inant... | 2950 letres | 1 comentars | ponc: )


La lia per i popui manacés - comunicat
Ladin Standard

 

Olà réstel pa l ladin standard?

La Lia per i popui manacés: "La provinzia de Bulsan dess respeté la toponomastica y l lingaz ladin - Mussner ti va do al ejempl di nemisc di ladins"

Associazione per i popoli minacciati / Gesellschaft für bedrohte Völker / Lia por i popui manacêsEncuei (26.09.2003) en ocajion dl di europeich di lingac envieia la lia per i popui manacés la jonta provinziala de Bulsan de dé pro finalmenter a la introduzion dl ladin standard desche lingaz aministratif. La lia per i popui manacés mostra devers l ejempl dl Cianton di Grijons, olà che l Consei ciantonal à bele dadie tout su l rumantsch grischun (rumanc grijon) sciche lingaz aministratif. Tl 2005 vegniràl ence ensigné tles scoles. Entratant na vijita al parlament ciantonal ova ence l president dl consei regional, Franz Pahl, laudé la politica linguistica dl Cianton di Grijons ti confronc dla mendranza rumancia. Südtirol dess jì do a chest bon ejempl di Grijons y dé al lingaz ladin l medem valour sciche ai autri lingac y declaré l ladin standard sciche lingaz ofizial aministratif. Esperc conscidra l lingaz unitar scrit sciche na "conditio sine qua non" per l souravive de na mendranza linguistica. Propi chest souravive à la jonta provinziala con sia delibera scandal ai prums de chest ann saboté. L ladin standard vegn praticamenter sclut fora da la adoranza tla aministrazion publica, donca na proibizion de n lingaz. Che chest sie na cossa da se daudé, ne él nia da s'en fé marevueia. La jonta ti à tout enscì un di puec strumenc essenziai a la mendranza ladina, dant de tò chesta dezijion ne fòvel vegnù damané degun espert linguistich, tant demanco l raprejentant lité dl consei.


metù ite da noeles ai 25 September 2003 da les 19:39:40 (992 liet)
(liej inant... | 14531 letres | 4 comentars | ponc: )


Les prumes reazions sun: cie nen dijeste pa dl LS?
Ladin Standard

 

Cie che ie pense dl ladin scrit unitar

N valgunes prumes reazions al envit de Erwin Valentini - "Saurí da lieje y saurí da entene"


Por me é l ladin unitar scrit de gran importanza y i le vëighe söl dër tru por deventé realté. L ladin scrit dess ester saurì da intëne y da scrì por düc i ladins zënza aldì o odëi fora l`idiom de valada. L ladin scrit ne dess nia tó ite l dialet trentin-venet. Adoré les parores ladines tramanades y arpades y al dess gnì chirì parores nöies aldò di bujëgns (arichì l numer dles parores).  I idioms ladins zënza na scritöra unitara é destinés a morì sciöche tl Venet. L ladin unitar che é bel pié ia se desleria fora man man che al vëgn scrit, lit, adorè y aprijé.

Mischí Florian, Selva


metù ite da noeles ai 05 September 2003 da les 21:27:33 (1017 liet)
(liej inant... | 5719 letres | 2 comentars | ponc: )


L projet SPELL va inant
Ladin Standard


Envit a colaboré y a mané ite osservazions

Valutazion dl ladin standard enchin a encuei  per na strategia linguistica tl davegnì

de dr. Erwin Valentini

I enc che sostegn l projet SPELL ova fat fora de jì inant chest ann con n program minimal y de nuzé chesta "paussa" per elaboré na strategia linguistica per l davegnì.  L ann de paussa se ruva bel plan y al é ora de pensé a mete ju n program de laour per l 2004 y plu inant; un di ponc sun l’ajenda  sarà la revijion y validazion dl model  de ladin standard (LS) dessegné  da H. Schmid te sia “Wegleitung”.


metù ite da noeles ai 18 August 2003 da les 10:02:21 (898 liet)
(liej inant... | 5040 letres | comentars? | ponc: )


Dla koiné ladina al Dì dla Unité Ladina à ence rejoné l assessour Mussner
Ladin Standard

 

Braies de coram ne ti joa nia al ladin

I todesc à sapù avisa cie che al va de bujegn per tegnì en pé na mendranza. Al vuel ester n lingaz scrit unifiché: l standard

Zitat da la Usc di Ladins 19.07.03: "Dla koiné ladina al Dì dla Unité Ladina à ence rejoné l assessour Mussner, dijan che sce l idiom ladin-gherdeina à souravivù tl centené passé, spo saràl ence bon de l fé sen y doman. Conclusio: l ladin standard podessa roviné i idioms de valeda...."Bera Mussner, o che al ne sa nia cie che al dij o che al é sforzé de lascé audì la medema plata che ti vegn metuda dant da si sponsors dla Regula. Mussner y sie assessorat s'á ence fistidié da scluje fora dal ejam de trilinguism i idioms ladins nia dla provinzia da Bulsan; enscì àl raforzé la tripartizion fascista. Chest fossa l assessour a la cultura ladina?

Dialetalisazion de n grup etnich vuel ence dì  folclorisazion, endebliment y en pratica ti tó l fle. 

Cie nen dij pa un di majers esperc linguistics ladins, dr. Lois Craffonara? Zitat: "Cie che i é mefodret dit dl'importanza de na grafia unitara, va moltipliché cent outes sce ala se trata de n lingaz de scritura unitar.", da Flus Leterares, pl. 421.


metù ite da noeles ai 29 July 2003 da les 10:00:17 (1131 liet)
(liej inant... | 3927 letres | 2 comentars | ponc: )


Intervista a Erwin Valentini, coordinadour dl projet SPELL
Ladin Standard

 

"L maiour stuep á fat levé su la dezijion dl Consei dl Istitut Ladin MdR"

L ladin unifiché á debujegn, per pié via, de na sburla dal aut, da les istituzions y da la politica, ma l Istitut Ladin é sté l prum a mete rams tles rodes  - Al ne fova degunes rejons per bloché la koiné

La delibera anti-Ladin Standard dl assessorat ladin tla provinzia da Bulsan al scomenciament dl ann (n. 210 di 27.01.2003), na delibera che scluj fora l standard ladin da l'ofizialité, podessa dassen compromete l suzes dl projet per n lingaz scrit unifiché per i Ladins dles Dolomites. Ala à ence sciuré descredit sun na istituzion che essa perdret l'oblianza de l promueve, l Istitut Ladin Micurà de Rü (MdR). L Consei, sot a la presidenza de H. Valentin che á bele n iade prové de archité via dut,  ti à dè lum verda a la esclujion con n "arat" zité tla delibera. Trueps se damana, sce na tel delibera jiva debujegn y ciunes che é les motivazions viadedò. No l assessorat, no l  Consei de Istitut ne á mai dé na spligazion o à araté de en ester debit una. L Consei dl Istitut Ladin savova avisa cie che al jiva a sostegní  - esclujion da l'ofizialité y enscí da un di prums ciamps de test  - y  chesta é la gran gravité dla dezijion/chestion, na sort de "Nacht- und Nebelaktion" (na azion acomplida de nuet y con ciarú), ideeda aposta per clandestinisé l ladin standard. Sun i ultims svilups ti onse fat valgunes domandes al coordinadour  dl Spell, dr. Erwin Valentini che conduj inant l projet enchin a la fin dl ann. Atualmenter é i laours limités a n "program minimal".

Noeles.net: Dl 2001 él vegnù prejenté la gramatica dl LS, de dezember dl 2002 l Dizionar dl LS, donca does opres fondamentales, co vala pa inant?

Erwin Valentini: L Dizionar dl ladin standard (DLS), dé fora a la fin dl 2002, y la Gramatica dl ladin standard (GLS), publicheda a la fin dl 2001, é les does operes plu conesciudes dl program SPELL ma i ne podon nia nes desmentié che ales é l resultat de n gran laour che é pié via bele tl 1988 con l’enciaria a H.Schmid de laoré fora la "Wegleitung" y spo tl 1994 con la aprovazion dl projet SPELL. Per ruvé a chest travert onse messù abiné adum materiai linguistics y enjigné ca massaries informatiches de vigni sort.


metù ite da noeles ai 04 July 2003 da les 17:06:52 (3135 liet)
(liej inant... | 16929 letres | 2 comentars | ponc: )


89 articui (6 plates, 15 sun vigni plata)
[ 1 | 2 | 3 | 4 | 5 | 6 ]
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.312 seconc