N juech doprò: na selezion ladina jia tl Grijon

En l ann passé ne ova la FUEV nia envié i ladins a la Europeada dles mendranzes europeiches - Protestes da pert dla lia per i popui manacés

Tardiva, ma ala é empò vegnuda a se l dé, na partida anter na selezion ladin-dolomitana y ladin-grijoneisa, tl medem luech olàche al é vegnù jié la Europeada dles mendranzes etniches en l ann passé, zenza na formazion ladina. Al fova vegnù dassen protesté da pert dla lia per i popui manacés a Bulsan che la FUEV y i rumanc grijons, sciche organisadours dla Europeada 2008, l campionat dl palé dles mendranzes europeiches, ne ova nia envié na formazion ladina. Ai ova crié "ad hoc" na "mendranza sudtiroleisa" (praticamenter na selezion de jiadours de clubs dl palé dl raion todesch de Sudtirol y 1 n jiadour ladin che é pro l Stegen/San Scimon) y an volova ence fé creie che al fossa sté i ladins laprò. Les protestes ova dantaldut arjont i media ti Grijons. La chestion à abù dant da puech n "juech doprò". Al é bele suzedù, ai 20 y 21 de jugn, ma la novela é che na delegazion ladina de Sudtirol ruveda via tla Svizra a ciafé i vejins dl Grijon y por tó pert anter l auter a na partida de palé contra la "Selecziun Sursilvana", en gaujion dl giubilé de 75 agn dl’assoziazion dl palé FC Trun/Rabius. L'iniziativa fova pieda via da Giorgio Costabiei, president dl US San Martin de Tor, che ova abù la ocajion da enconté Andrea Rassel, vizepresident dla FUEV (Federazion europeica di grups etnics) y anter i organisadours dla Europeada, l campionat de palé dles mendranzes d’Europa. Sen spera Costabiei che i ladins posse tò pert autonomamenter sciche "mendranza ladina" a la proscima Europeada dla FUEV.
L logo dla Europeada de setember 2008, a chela che i ladins dles Dolomites ne fova nia vegnus enviés, per rejons politiches.

Traslaval 2009: per montes y per valedes

Dai 28 de jugn ai 3 de messel 11eisema edizion dla roda a etapes te Fascia  

Al fala puech plu de n meis dal scomenciament y l capo-organisadour de chest gran event, Stefano Benatti, descuer finalmenter ciugn che sarà i "trois" dles raides dla gara da sauté/jì a pé te 5 etapes de "Traslaval" dai 28 de jugn ai 3 de messel. Al ne mancia nience en chest ann n valgunes novités, da mete man da la pruma etapa, con pieda demez veduda dantfora da les 5 domesdì per ti consentì ai partezipanc de ruvé tla val, ence per tò pert demé a una dles 5 etapes sciche l regolament preveid.

I partezipanc al start te una dles edizions da denant.

Ligreza encuei per i fredesc Moelgg y si fans tla Ladinia

Copa de cristal a Manfred Moelgg y medaia de arjent a Manuela Moelgg pro Campionac mondiai a Bormio

Ligreza y delujion é tl sport dret damprò. Al basta n pice fal é dut é perdù. Encuei a Bormio pro i Camionac de schi alpin él endere propi sté n dì de gran ligreza per i fredesc Moelgg. Manfred à podù pié do la picera copa de cristal per avei abiné adum tl slalom la majera cumpeida de ponc, vuel dì avei abù la majera costanza con de bogn resultac. Manuela Moelgg se à plazé seconda tl gigant con does manches garatedes. Gran delujion per l garejadour franzeis Jean Baptiste Grange, te classifica dant da Moelgg, ma à pozeré tla seconda manche. Enscì ti àl basté a Moelgg n sest post tl slalom encuei.

Finalmenter ti garétela a Manfred Moelgg

Prum encuei tl slalom spezial a Kranjska Gora tla Slovenia

Do ester sté bele sies outes sun l podest te chesta sajon de gares à l atlet marou finalmenter davagné la pruma outa na gara de Copa dl Mond encuei tl slalom a Kranjska Gora tla Slovenia dant dal craot Ivica Kostelic y dal austriach Marcel Hirscher. Les mioures congratulazions!!

Sella Ronda Bike day chesta outa éla juda miec  

"Sella Ronda Bike Day", trueps, ma nia duc a una 

Moena à festejé l or olimpich de Cristian Zorzi

Medaia de or tla gara de paslonch a stafeta arjonta deberieda con Fulvio Valbusa, Giorgio di Centa y Pietro Piller Cottrer 

Carolina Kostner ne venc nia na medaia, ma i cuers

La jadinadessa ladina de Urtijei/Gherdeina se à plazé al 9. post tl jadiné artistich sun glacia - N sport olache l suzes é sun l fil dla lama

Carolina Kostner, 19 agn apeina complis, se à plazé al 9. post a les Olimpiades a Turin en juebia seira ai 23 de fauré 2006, mioran sia posizion dal dí denant olàche ala se ova plazé al 11. post tla proa ledia. Ence sce n valgugn fai ti à costé bendebot de ponc, réstel la convinzion che al sarà una dles campionesses sun la glacia da endoman. Al é 27 agn che l'Italia ne ova nia plu abù na tel bona atleta tl jadiné sun glacia.

Carolina Kostner con sie alenadour. Sie debut a chestes Olimpiades ne à nia condut a na medaia, ma les previjions dij che al é na steila sun la glacia tl nasce.

 Sit ofizial de Carolina Kostner

 

I elvetics ti é stés souracef a duc  

I "azurs", la scuadra taliana, à depierpul messù reconesce na desfata - miec les eles che i ei

Belavisa desche tla sajon passeda dla NOKIA Snowboard FIS Copa dl Mond 2005/2006 é i elvetics stés i mairenc (miours) tl paralel gigant tegnù sun la pista Pré da Peres sun jouf de Furcia. Pro les eles à davagné Daniela Meuli che se la à fata a valei, condut che ala fova desfreidida, tla competizion con Julie Pomagalski (FRA).

Foto: Simon Schoch (2), Philipp Schoch (1) y Marc Iselin (3) y Gilles Jaquet (4).

Carolina Kostner arjonj bron a Mosca

Endò n iade ésen restés a bocia daverta per la gran bela arjonta de Carolina Kosnter, la medaia de bron ai Campionac dl Mond de jadiné artistich a Mosca dai 14 ai 20 de merz 2005. Pruma é steda: Irina Slutskaya (Russia) y seconda Sasha Cohen (USA). N ann con de bones prestazions da pert de Carolina: chest ann s'ála bele plazé pruma ai Campionac talians y setima ai Campionac Europeics. Carolina Kostner, 18 agn de Urtijei, é chersciuda su con la glacia. Sia oma, Patrizia, fova na jadinadoura artistica aleneda da sia lava, sie pere, Erwin, alenadour de hockey sun glacia y sie fré, Martin, juga a hockey. Encuei ti él vegnú fat gran festa a Urtijei. Ma bele defata messarála jí endò a Oberstdorf ti Paisc Todesc, oláche ala studia y se aleneia per la proscima sajon da jadiné. Nia dret dalonc ne é nience i Juesc Olimpics a Turin dl 2006.

Isi Kostner endò anter les mioures

Tles ultimes edemes àla endò recuperé sia vedla forma y la segurté che an adora

Isi Kostner de Urtijei/Gherdeina, ti ultims agn la steila dla scuadra taliana con 49 deventes te Copa dl Mond, does outes declareda sportista dl ann, ova abù dassen da patì do n inzident sun pista en l ann passé  a Lake Louise y à fat ert da se remete. Ala à duré codie che ala fossa endò en plena forma. Te chesta sajon de gares de Copa dl Mond, desfortuna do desfortuna. Encandenò se àla out enier: Isolde Kostner à arjont l second post  a Haus tl'Austria, do la todescia Maria Riesch y dant la austriaca Renate Goetschl y encuei l prum post tla desceisa.

Manfred Moelgg fej bate i cuers

L simpatich joen marou é sen la speranza dla scuadra taliana - A Madonna di Campiglio y Flachau ál desmostré sies capazités

Enier da seira gran liegreza a Al Plan de Mareo y te duta la Val Badia pro si fans per Manfred Moelgg che á arjont sie miour plazament enfin a sen, n bel second post al slalom lerch di ei de Copa dl Mond a Schladming (A),  con 57 centeisems de retert sun l prum plazé, l austriach Benjamin Raich con n temp de 1:41,67 y dant al finlandeis Kalle Palander. Manfred Moelgg spera sen che al ae l am de se plazé inant ti prums posc' tles proscimes garejedes. Ence sia sour Manuela Moelgg garejeia.