Da la II.a Comiscion provinziala per la sconanza dla contreda
Data: 14 April 2005 da les 13:53:59
Tema: Aministrazion



Dé pro implant nuef a S. Cristina

Arac per l projet de costruzion de na sentadoia a cater posc’ nueva tl Comun de Santa Cristina y de realisazion de na streda d’azes tl Comun de Mareo

Aldò dl bonarat dla seconda comiscion provinziala per la sconanza dla contreda pò la sozieté implanc portamont „Mo.PA srl“ de Santa Cristina te Gherdeina fé su l implant a scagns a cater posć da Mont de Pana sun Mont de Soura. L implant a cabines nuef empede la sentadoia atuala ará na lungheza de 1580 metri y vegnirà sostegní da 19 pilons. Enfin a sen menova l implant vedl endut 1200 schiadours a l’ora sun Mont de Soura. „Chesta cumpeida dess resté unfat, ence sce l implant nuef à na capienza de conduje a mont perdret 2.200 persones a l’ora“ à dit l president dla comiscion Adriano Oggiano. Per cie che reverda la stazion a val méssel vegnì metù dant n projet comedé.

Sajon da d'isté, sajon da mete a post i implanc portamont: chest ann ti tóchel al implant da Mont de Pana sun Mont de Soura.



“La stazion nueva de apresciapuech 400 metri cubics dess vegnì logheda ite miec tla contreda entournvia. Ala dess, almanco en pertes, vegnì costruida sot tera, vegnì fata su de pera y corida ju con n zop vert”. Te vigni caje vegn la stazion a val vedla trata ju. L material che vegnirà ciavé fora per fé su l implant dess vegnì desćiarié, a una con l’autorité forestala, sun la pista Mont de Soura B. Ala se trata de apresciapuech 7500 metri cubics de tera. Desćiarian ju l material sun la pista di schi se sparàgnen entourn 400 de iadesc con l camion. Con la costruzion dl implant vegniràl tamben realisé na sotpassadoia per ti ruvé permez a les ciases sun Mont  de Pana. La comiscion é dla minonga che i murs de sostegn per la sotpassadoia dess ester manco lonc de coche ai é projetés y che ai dess vegnì fac su a na maniera che dà manco a uedl.

Do n sourapost fat en vender dant à la seconda Comiscion provinziala per la sconanza dla contreda ence tout la dezijion che la streda forestala „Cian Ros“ te Mareo, che conduj pro l implant portamont dal medem inom, pò vegnì deslargeda y slongeda. L troi dess deventé apresciapuech 600 metri plu lonch aldò dl projet dla vejinanza de Al Plan. „Ti posć olach’al vegnirà sposté material méssel vegnì empradí do che i laours é vegnus scluc ju”.  (osp)







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=993