En chest auton vegnirál sclut ju i laours de costruzion y de aredament tla "Ciasa alberch" ladina tl raion dla ex-fiera tla streda Roma a Bulsan. Endut sarál a desposizion 32 mini-abitazions con cianton da cujiné per laoranc y studenc ladins che  viv, studieia y laora a Bulsan. Per arjonje la realisazion á dassen mené do la "Consulta per i problems Ladins a Bulsan" y dantaldut la lista LADINS. Carlo Willeit á cumpedé adum dut l credit che l grup ladin á a sie ben tl ciamp dl fabriché slesiré. La "Consulta per i problems Ladins tl comun de Bulsan" ova ence abiné adum les domandes per desmostré l gran debujegn. Na gran bela cossa, afité n cuartier a Bulsan é gonot cer y ciarent. Na ciasa dl IPES tl raion dla ex-fiera a Bulsan.

Les abitazions é vegnudes realisedes dal IPES en basa al art. 148 dla lege provinziala n. 13/98 che veid dantfora la realisazion de  "ciases alberch" per laoranc y studenc ladins per avalivé l credit che l grup linguistich ladin á a sie ben. Una de chestes s'en án damané a Bulsan. Do la lum verda dla Jonta Provinziala, á l IPES á tout su l'enciaria y do che l comun de Bulsan á auzé la cubatura tla zona ex-fiera ésen passés a la costruzion dla "Ciasa alberch" ladina.  L Istitut se festidieia ence de aredé les pices mini-abitazions (en gran pert da una na ciamena con cianton da cujiné, ma valch una ence con does ciamenes), che va dai 28 ai 30-35-40 mc con solé, donca cleves tla man y atira abitables. Les domandes de assegnazion vegnirá toutes su da jugn inant. Anter i recuisic él la declarazion de pertegnenza linguistica. Les autres condizions, dates y scadenzes vegnirá lascedes alsavei dal IPES, do che ales á giaté l'aprovazion da la Jonta Provinziala. An se á damané che la Ciasa alberch ti vegne sourandeda da manejé a n comité de gestion ladin.