MS Office empara Rumanc Grijon
Data: 28 March 2005 da les 14:03:34
Tema: Grijon


 

Microsoft Office rejonarà ence Rumanc Grijon da chest ann inant

La MICROSOFT americana realiseia y finanzieia tl cheder dl "Local Language Program" na interfacia y n program de comedura ortografica per MS-Office per Rumanc Grijon - Download debant da d'auton dl 2005

La Microsoft realiseia tl ram de sie "Local Language Program" adum con la Lia Rumantscha y l Cianton Grijon na interfacia rumancia per i utilisadours per un de si programs plu conescius, l Microsoft Office y laprò n program de comedura ortografica. I aplicatifs vegn svilupés sun la basa dl lingaz de scritura unifiché, l Rumanc Grijon (che corespon al Ladin Standard o Ladin Dolomitan chilò da nos), y sarà a desposizion da d'auton 2005 tla forma de n download debant. Vedei chisc svilups tla Svizra sotrisseia endò n iade tant assurda che la dezijion dl Assessorat Ladin tla provinzia de Bulsan y dla politica SVP é de mete sun na pert y de sofoié ju l Ladin Standard.



L «Local Language Program» dla Microsoft dà l muet finanziar de realisé interfaces da utilisadour di produc Microsoft ence per lingac manco deslariés. La precondizion per realisé chest projet, finanzié da la Microsoft enstessa, é samben steda l'esistenza de n lingaz standard ofizial da scritura, vuel dì l "Rumantsch Grischun" (Rumanc Grijon), reconesciù dal Cianton y da la Confederazion y sie interessament per avei chest strument.

La pert linguistica é vegnuda elaboreda da la Lia Rumantscha, l'organisazion da tet  dles unions linguistiches y culturales rumances, sun enciaria dl Cianton Grijon. Al se trata de n lexicon y de n glossar tecnologich de terms informatics rumanc. Tl meis de fauré  2005 é n colaboradour dla Lia Rumantscha bele jolé a Seattle, senta dla Microsoft ti Stac Unis, per dé inant les istruzions linguistiches. L'aplicazion rumancia podarà vegnì integreda ence te programs dla Microsoft Office bele instalés, sibe per cie che reverda la interfacia che l program de comedura ortografica. N download debant de chisc programs suplementars sarà a deposizion da d'auton dl 2005.
"La colaborazion anter la Microsoft Svizra y l Cianton Grijon é n vare emportant per renforzé y deslarié la doura ativa dl lingaz scrit unifiché", dij Claudio Lardi, cef dl departament d'educazion, de cultura y dla sconanza dl ambient dl Cianton Grijon, enjontan che  "L fat che les aplicazions da Microsoft Office pò vegnì tost adoredes per rumanc, sostegn dassen l Cianton Grijon te sies bries da mantegnì a longia veduda l rumanc tla vita da vigni dì desche realté vivuda." Chestes massaries linguistiches jirà plu inant dret de uega pro la introduzion dl Rumanc Grijon te scola.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=976