Na lingia de manifestazions enfin a la fin dl ann
De mei conzert con Sabina Willeit, de otober esposizion "Vejin", de november teater
La Consulta Ladina dl Comun de Bulsan organiseia vigni ann na lignora de manifestazions per i Ladins aciasés tla zité y ence de sensibilisazion envers i convejins talians y todesc. Chest ann á sies ativités culturales bele metù man con n conzert de mujiga moderna con i grups "Acajo" y Jean Daniel Granruaz tl salf dla Carambolage ai 9 de merz (ciala fotos tla galeria), dant a n salf toch y plen de jent. Ala jirà defata inant con na seira de leteratura ladina che veid alapert Brunamaria Dal Lago Veneri, Ingrid Runggaldier, Maria Pedevilla y Marta Rungger ai 13 de auril, da les 20.30 tl "Circolo Cittadino" tla Streda Grappoli/Weintraubengasse, 2. De mei conzert classich con la ciantarina Sabine Willeit.
Tres de auril él vedù dantfora la prejentazion di ac dl Convegn tegnù en l ann passé da d'aisciuda dal titul "Les poscibeltés dl ladin - idees per na promozion linguistica". Ai 24 de mei podaràn scuté su n bel conzert de mujiga lirica con Sabina Willeit tl salf dl Nuef Teater Comunal.
Do la paussa da d'isté à la Consulta fat fora de mete endò a jì l'esposizion "Vejin" (www.vejin.com) tl "Centro Trevi" tl temp dai 3 ai 12 de otober con n program informatif da cheder a l'esposizion atualiseda: conferenzes tl lingaz talian y todesch soura i Ladins con la finamira de fé conesce foradecà storia, tradizions y usanzes ladines. Dantaldut vuelen ti pité na ocajion de informazion a les scoles dla zité. Plu inant él sun l program endò na raprejentazion teatrala per ladin ciamò da fé organisé tl detai. L ann se sclujarà ju tl cheder dl Marcé dl Pice Bambin tl temp de Avent a Bulsan con en valgunes manifestazions da Nadel. Valch una de chestes vegnirà endrezeda via deberieda con la Comunanza Ladina a Bulsan. Data, ora y luech dles manifestazions vegnirà lascés al savei damprovia tres i media.
