ASIS: enrescida scientifica
Data: 06 March 2005 da les 17:49:51
Tema: Cultura



Les rejonedes dl'Italia dl Nord te n database on-line

Al vegn enrescí les desvalivanzes tla sintassa de duc i dialec talians dl'Italia setentrionala, dl ladin y furlan 

L projet ASIS (Atlant Sintatich dla Italia dl Nord) é n program de archirida linguistica metú en pé da l'Université de Padova con l fin de registré y de analisé les variazions sintatiches di dialec talians tla Italia dl Nord. La banca dac é on-line y daverta a duc. Desche al é usanza tla facolté de romanistica de Padova ne vegn l ladin y l furlan nia vedus desche sistems linguistics a pert dai dialec talians, ma tl tiesciú dialetal nordtalian. An i definesc "arcaics", ametan indiretamenter che al se trata empò de varietés loghedes al our y conferman enscí sia desvalivanza.


Les desferenzes de majera relevanza anter ladin-retoroman y i dialec talians é tres les medemes: palatalisazion de -ca- y -ga- (che vegn endere ence dant te valgugn dialec al confin, les enscidites anfizones, ma d'inrer y nia generalisedes), plural en -s, mantegniment di liams -pl-, -fl-, -gl-, -cl- y e.i. A pert chest é l atlant interessant, davia che an ciafia da vedei empera les medemes frases te n grum de formes dialetales talianes dl nord, plu furlan y ladin dles Dolomites, che é dret desvalives anter eles sibe tles paroles che tla sintassa. An veid enscí p.ej. tant forest che al é l dialet dla Val Biois/Agordin (che reclameia de ester "ladin") da chel dl Sela. L rumanc di Grijons ne é nia sclut ite. Per la Ladinia giáten desche ponc de relevament: San Linert y Corvara tla Val Badia y Selva te Gherdeina.

L liam al sit: http://asis-cnr.unipd.it/query.en.html







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=960