Pensiers soura l'assemblea dla Generela
Data: 27 December 2004 da les 18:19:14
Tema: Cultura



La ladinité é carateriseda da ambiguité

N cheder scialdi fosch dla situazion atuala dla Union - Trent á depierpul bele reconesciú la Generela con na lege provinziala, n segn de respet

Pro l’assemblea dla Union Generela ai 22 de dezember él vegnú descrit n cheder scialdi fosch dla situazion atuala dla Union. Al mancia l personal y i joegn, an sta dant a ostacui de natura politica, i finanziamenc ne é nia vigni ann segurés. Souraprò à la Generela, do mia minonga, da se confronté con n auter, rie problem: chel dl debel sentiment de unité di ladins. Sce i todesc dl Südtirol à da se paré contra les ingiustizies o da se cruzié dles chestions de sia mendranza, se séntei dantaldut todesc, soura les desferenzies anter les valedes (puster, venuost, lont...) fora. Tles valedes ladines endere é la ladinité carateriseda da ambiguité: al vegn sotrissé truep de plu la desvalivanza anter ladins de Südtirol y ladins de Trent o di trei comuns tla provinzia de Belun. Ladins todesc contra ladins talians. Al é does realtés da tegnì despartides.



Chesta ambiguité é do mia minonga ence da vedei tla enconteda di ombolc. Al vegn con chesta scomenciadiva scì reconesciù l raion ladin storich dl Sela, ma d’autra pert à i ombolc ladins de Südtirol dé da capì che te chest organ de coordinament ài la maioranza. Tla Generela ései bonamenter duc i ladins parifichés y i fascians y i ladins da Souramont à massa peis. Chest ne và nia.
Ie personalmenter sostegne la enconteda di ombolc, sciche i é bele abù ocajion de scrive, sce an va ite tla sostanza, sce duc i ladins é partners parifichés y sce an ne sburla nia demez la Generela. La Provinzia de Trent l'à bele reconesciuda mudan na lege provinziala (!). N at de respet. Trent à capì ciuna che é la finalité dla lege 482/99: i comuns dessa reconesce – y, sce i vuel, integré - ma no sostituì organs de coordinament. Fabio Chiocchetti à te chest cajo baié cler pro l’assemblea: i comuns à autres finalités, politiches y aministratives, la Generela endere, unica sui generis, é na soziazion che se cruzia de coordiné l’ativité culturala sciche ala perauter à tres fat. Al é does istituzions, scich’an dij, compatibles.
I ti feje les mioures audanzes y i complimenc a la presidenza dla Generela y a si colaboradours che é stés bogn da la mené inant anter dutes chestes dificoltés N bon Ann Nuef.

Ivan Lezuo
President dla Comunanza Ladina a Bulsan







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=917