Dantaldut él da se damané, sce al va debujegn

Al é plu lies y istituzions che se à fat trueps meric y no demé la Generela - L Ladin Standard sarà una dles prumes chestions da pié ite

Co Ves imagineise pa chest consei di ombolc?
Dantaldut él da se damané sce al va debujegn de n tel consei. Sce sci, spo él da me enfora dessegur na bona iniziativa, ajache chest consei messarà tò ence dezijions politiches y perchel él dret che chi che tol ite na tel stiera ae na legitimazion da pert dla jent.

Bruno Senoner, ombolt de S. Cristina/Gherdeina.

La Generela di Ladins éla pa destineda a resté te n piz?
I ne son nia bon de capì, ciuldì che an dess ti dé la preferenza a una o l'autra lia culturala. Da me enfora él plu lies y istituzions (istituc culturai, pedagogics, Consulta...) che se á fat trueps meric y perchel él dessegur dret de se lascé consié y colaboré con plu lies y nia esclusivamenter con la Generela

Chest consei podaràl mo avei n influs sun i problems dla unificazion di ladins? La bandiera dla Generela (verda-blancia-blea) podesséla pa vegnì conscidreda a livel politich regional?
Chest consei pò dessegur dí la sia sun chestes chestions. Mia minonga personala é che duc i ladins tocassa pro la provinzia de Bulsan, ajache chilò él na autonomia segura sot a sconanza internazionala y perchel ne onse nia da temei per l davegnì. Chesta conseguenza vel ence per la bandiera, olache ie ne é degunes dificoltés a reconesce la bandiera blancia y cuecena dl Tirol ence desche nosta bandiera che i on perauter bele da passa 600 agn.

Ciun é pa l comportament dl consei di ombolc ti confronc dla rejoneda unificheda?
L comportament dl consei podaràn dessegur empermò vedei y savei canche chest consei gnirà costituì y tolarà posizion en chest cont. Dessegur sarà la rejoneda una dles prumes chestions da pié ite y da tò na dezijion.

Ciugn podessa pa ester i coliamenc anter les provinzies?
I coliamenc soura i confins dla provinzia fora pò y dess gnì intensifichés y chilò saràl dessegur l consei di ombolc, sce al essa da deventé operatif, da laoré fora propostes che va te chesta direzion.

Ciuna é pa la posizion dl consei ti confronc dl finanziamenc di massa media ladins?
Ence te chest caje podaràn dessegur empermò vedei y savei l comportament de chest consei can che al sarà costituì. I mass-media à dessegur na gran emportanza y ence na gran responsabelté, ma dessegur ne se lascia degugn mete sot a druch y tò posizions desferentes dal cuer y sentiment de union demé, ajache a un o al auter jornalist ne  podéssel nia ti jí a scusa.