Impröma Albin Pedevilla, spo ince Heinrich Huber - Fonjo Winkler va ite te consëi y te junta

"Al ne ê nia plü les condiziuns por laurè inant". Sciöche incundè danfora bele de dezëmber él gnü dè at ufizialmënter tratan la sentada da in vëindres passé (10.01.2003) dles demisciuns dl assessur y aconsiadù dl paisc da Rina, Albin Pedevilla dl Cargà, instës gnanca plü prejënt ala sentada. Por ël ne êl nia plü les condiziuns por laurè bun inant, mo al ne à nia orü dì avisa ciönes che é stades tl concret les gaujes. An sa dles desvalianzes danter i aconsiadus da Rina, da öna na pert i aconsiadus daimprò dala SVP sciöche le ex-candidat da ombolt Doro Castlunger y Heinrich Huber y i atri, ragrupà incër Fonjo Winkler, pröm nia litè. Na situaziun politica che respidla, plü o manco i 2 "clans" te paîsc. Les relaziuns, zënza bele ries, é gnüdes intossiades ultimamënter dandadöt cun le referendum metü a jì por la dortoraziun dla dlijia dl paîsc.

Pro le referendum l'à devënta cun le 80% la proposta dl presidënt dl Consëi de Ploania impede en proiet favorisè dai aconsiadus Heinrich Huber y Doro Castlunger che ess odü danfora in plü en pice ampliamënt dla dlijia. Chisc ne à nia orü reconësce deplëgn le resultat dl referendum y "de avëi pordü" y chilò àl metü man da coè le strît y les rüjes, mo nia ma, le sënn va plü sot.

Mo la dërta gran sorprëisa dla pröma sentada dl ann dl comun de Mareo ne é nia stades les demisciuns de Pedevilla, porater anunziades danfora, mobëgn les demisciuns daldöt nia aspetades de Heinrich Huber, 22 agn aconsiadù tl comun de Mareo y profescionalmënter secreter particolar dl "Landeshauptmann" Durnwalder. Döt é jü debota. Canche l'ombolt à fat la proposta de Fonjo Winkler, pröm nia lité da Rina, da inciariè tambëgn sciöche assessur, à Huber dè les demisciuns ciamò denant che an passass ala lîta de Winkler, conesciü ince por sües simpaties por la lista Ladins. Na pert mina che Huber ais trat fora sües demisciuns sciöche ultim teriunf por condizioné i atri aconsiadus, dandadöt i aconsiadus dlungia ala SVP, de ne ti dè nia la crëta a Fonjo Winkler sciöche assessur nü. Val' un pënsa ince che l'intenziun foss stada chëra de portè ite tl jüch Doro Castlunger sciöche assessur, cossa nia orüda dal ombolt. Castlunger é tambëgn lovè sö ciamò dan la lîta y s'un é jü in sëgn de protesta. Metü ala lîta sön proposta dl ombolt Palfrader, à Winkler ciafè indere 11 usc sön 13, na ampla maioranza, ince di aconsiadus daimpro dala SVP y indiretamënter na conferma dla lîta fata dal ombolt.