"Perchel jola i corfs tant aut"
N valgunes fantinedes sun i ladins, ventedes encantourn: contia per ladin standard de Rafael Prugger da desćiarié tl format *.pdf
I on l plajei de podei ti sporje a nosc letours una dles prumes operes leterares per ladin dolomitan. Ala se trata de na contia che é madurida te n rai de temp de 20 agn. L autor Rafael Prugger de Urtijei, nasciù dl 1961, á scrit la pert zentrala dl 1983 y spo ál fat damprovia enjontes y limedes. La spligazion dl autour, ciuldiche al adora l ladin standard, é chela che al vuel arjonje empera n maiour certl de letours te duta la Ladinia.
L protagonist dla storia, Scimon, se fej n grum de pensiers soura sia valeda, Gherdeina, do sia minonga l plu bel raion dl mond. Cie che ti dà deplú da pensé é l comportament de sia jent. Al mancia na vijion culturala che mire a varenté l lingaz y la cultura ladina. L’assimilisazion volontara a la cultura foresta y l servilism é i elemenc predominanc. L maridoz anter economia y politica lascia puecia lerch a alternatives o minonghes desferentes. An auda fora l gran encresciadum dl autour do chi ideai che dess perdret avisé la jent ladina de jì inant sun sies giames y de ne sauté nia per comodité sun n ciar forest. Purempò ne vuel l autour nia che la contia vegne veduda sciche esprescion de deguna speranza per l ladin, él pu deplù momenc de gran speranza y ledeza laite. L autour à abadé che trueps tol su chest scrit desche na mueia. El rata che chest sie demé n preconzet che nos duc on te nost cervel, na reazion istintiva dles mendranzes al sentiment de sotmiscion che i on permez a les gran cultures che an dess combate.
