Museum Ladin Ciastel: esposizion
Data: 02 September 2004 da les 14:52:02
Tema: Cultura


 

"L chiet tla scultura"

Artisc’ de Gherdeina tl Museum Ladin: Franz Canins, Hubert Mussner, Otto Piazza y Vinzenz Senoner

En chest vender, ai 3 de setember, végnel daurì tl Museum Ladin na esposizion de cater artisc' de Gherdeina, duc canc con esperienzes de mostres y scric ite pro l’UNIKA.  Ai esponarà si laours ti salamenc dedichés a les mostres temporanes. Al se trata de: Franz Canins, Hubert Mussner, Otto Piazza y Vinzenz Senoner. Foto: Les rondules, n laour de Franz Canins.



Franz Canins de Urtijei se dà ju con i tiers: ciavai, ciuites, cioures y en. i.  L artist met te si laours, coche al vegn splighé da la storica d’ert Danila Serafini,  l dret significat dl soget, olache al ne é deguna astrazion. Hubert Mussner (n sie laour foto a mandreta) de Selva laora con la figura umana che é “conceda ite  te na lerch che l artist calcoleia avisa”. Sun l tema dl’ela y con  i retrac laora Otto Piazza, ence el de Selva, che desmostra de avei n gran savei tecnich. Sies scultures trasmet chiet y pesc. Muses ovales, chietes, che sta endretasù y plenes de dignité: al lascia da na pert dut chel che é ghirous y compliché. Chisc é i artisc’ che espon sies operes d’ert tl Museum Ladin te na mostra dal titul “L chiet tla scultura”. Chest chiet vegnirà raprejenté con na performance che i artisc’  enstesc portarà dant en gaujion dla daurida sot a la direzion de Heidi Stuffer, se basan sun n azion de teater.
La prejentazion di artisc’ vegnirà fata da la dot. Danila Serafini, storica d’ert y ensegnanta d’ert tla Scola d’Ert de Urtijei. L'esposizion vegn daurida, desche dit, en chest  vender, ai 03 de setember 2004, da les 18.00 tl Museum Ladin Ciastel de Tor a San Martin y romagn daverta enfin ai 12 de setember.

 

N liam a zipladours de Gherdeina:

http://www.fraema.it/







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=812