L strit danter ladins storics y
Data: 13 January 2003 da les 13:26:05
Tema: Cultura


 

Dut resta unfat desche denant 

Rie convive anter Ladins storics y neo-Ladins tl Beluneis

de Lorenzo Soratroi

L’ultima senteda dla Federazion dles Unions Ladines tla region dl Venet à desmostré ciamò n iade la vijion desfarenta dla ladinité anter i ladins “storics” y i “ nia storics“. Argoment da descore fora resté medem da n ann encà: la mudazion dl statut dla Federazion. Na comiscion metuda su per studié la tematica s’ova fermé te sie laour daviache l rapresentant di aconsiadours di ladins “nia storics”ova scrit al President Iji Menardi Malto de “retegnì che al ne sie nia plu les condizions per jì inant a descore de chest”.

Sul retrat: Fodom. Ladins y "pseudo(neo)-Ladins", le strit por i mesi finanziars. Chisc ultims vuel avei tres deplù.



Enlaouta ova i ot aconsiadours de Fodom, Col, Ampez, deberieda a chel autonom da la Rocia dezedù de clamè ite la Federazion per voté na proposta de mudazion al statut. En concret vegnìvel proponù che la Federazion fossa metuda adum da does sezions autonomes: da una na pert i ladins di trei comuns, a chi che ence la provinzia de Belum à entratant reconesciù na spezifizité storica desfarenta da dut l rest, y da l'autra pert dutes les realtés neo–ladines nueves. Vignuna dles does sezions essa la poscibilité de tò ite unions ladines nueves. L consei dla Federazion, tres aldo de chesta proposta, essa abù da ester metuda adum dai Presidenc y dai Vizepresidenc dles does sezions. Na proposta che dant da n ann vedova a una feter dut l consei, a pert chi da Alie y de Selva de Ciadoura, ma che encuei é vegnuda refudeda dai rapresentanc agordins, ciadorins y comelians con la viertola de volei empruma descore fora la chestion dla despartizion di finanziamenc regionai.

Na mudazion al orden dl di che l consei à refudè a maioranza, ma nia à jové per fè jì inant empò la discuscion soura la mudazion dl statut dla Federazion che pò vegnì mudé con la ousc a una de doi terc dl consei.
La discuscion é degenerada ence per via de certes posizions de valch aconsiadour, perauter tres i medems, che recorda cotan l model de n nuef Adel Smith. Nia ne à jové da pert di aconsiadours di trei comuns y dl President Iji Malto,de recordé che propi tla proposta dl statut nuef vegnel descorù dla chestion di finanziamenc regionai che, sce al ne vegn nia giaté na soluzion daite da la Federazion, vegnirà partis su con l arbitrat dla Region. Pesocia la posizion di autri aconsiadours che à enchinamai desprjié l operè dl assessour regional Maria Luisa Coppola con l afermé de ne avei deguna fidenza te sie operé. Na bela gran contradizion ti confronc dla Region, sce an pensa che tl medem temp, i medems rapresentanc dla Federazion  fej l diaul a cater per arjonje i finanziamenc che propi chest ent dà fora. La senteda s’à sclut ju con na votazion che à vedù a una nuef aconsiadours contra set tl voté la mudazion dl statut. Nia de fat, dut resta sciche dant, ence la despartizion di finanziamenc.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=80