Theodor Rifesser reprejentant ladin tla Jonta dl’Université

Do che al é jù en doura les mudazions dl statut universitar

Ajache deguna dles does enciaries da vizepresident tl consei de aministrazion dla Université Ledia de Bulsan ne é corida da n Ladin, se à l assessour ladin Mussner fat inant che n reprejentant dl grup de rejoneda ladina ruve te jonta. Ence l president dl consei de aministrazion dl’Université Friedrich Schmidl, fova dla minonga de abiné na soluzion che respete l grup de rejoneda ladina y à enscì porté inant la proposta de fé na mudazion al statut. Chesta adorova endere l bensté da Roma.

Dant da puech él jù en doura les mudazions dl statut universitar y enscì à Theodor Rifesser sciche reprejentant di comuns ladins tl consei dl’Université ence podù vegnì tout su tla Jonta de Université. L assessour ladin Mussner se à declaré content de chesta arjonta: „Al é emportant che i Ladins ne sie nia demé ti conseis de aministrazion, ma ence tles jontes esecutives o sciche vizepresidenc de nostes istituzions plu emportantes. Tla jonta dla Université végnel tout dezijions emportantes pro cheles che i bujegns di Ladins mess vegnì respetés, dantaldut per chel che à da nen fé con la facolté dles scienzes dl’educazion. Tla facolté dles scienzes dl’educazion dla Université ledia de Bulsan végnel pité cursc y plans de stude aposta per i Ladins. Rifesser se à bele enfin a sen fat inant che chest ensegnament vegne ciamò slarié fora. (osp)