Declarazion de vera al spam
Data: 08 July 2004 da les 00:00:00
Tema: Tecnica: computer, internet y e. i.


 

Vera a la posta refudam

Conferenza internazionala a Ginevra da encuei inant - Al vegn ghiré na majera colaborazion internazionala anter i statesc

En gaujion dla pruma conferenza "anti spam" metuda a jì da les Nazions Unides vuel raprejentanc de 60 statesc y organisazions internazionales ti declaré la vera a les emails de reclam nia apostedes. "Al se trata de n problem che i messon ensivé ite y combate" dij l cef dla aministrazion australiana dles telecomunicazions, Robert Horton che à daurì la debata de trei dis encuei (07.07.04) a Ginevra.



Sot al tet dla Union Internazionala dles telecomunicazions (ITU) vuel i raprejentanc arjonje na majera colaborazion internazionala tla bataia contra les persones y les sozietés responsables dles "agajons" de posta refudam con l travert de ruvé a na uniformazion dla legislazion. Tl temp de doi agn dess la flumera de posta refudam vegnì metuda deberieda sot a control.

En basa a les sciazedes dla ITU é l 75 y 85 % dles emails entratant posta refudam. Con n tel aut gre végnel clermenter superé la traversa de vigni toleranza, dij Horton, ma n stat da soul  ne é nia datant de controlé l flum de posta refudam, enjòntel. L problem é internazional y i messon colaboré te na forma coordineda, ajache l stat plu debel é ence l anel plu debel dla ciadeina."   

Desche prum vare se tol dant la conferenza de arjonje che vigni stat nomineie n responsabel soul per chesta chestion. Tl medem temp déssel vegnì ejaminé te ciuna maniera i singui statesc scona i derc di consumadours. (if)







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=749