Trent: esposizion dai 18 de jugn ai 7 de november '04
Data: 20 June 2004 da les 18:55:37
Tema: Storia


 

"Veriers, prinzesc y eroes" 

Na esposizion che conta la storia de nosc raions da les prumes fusties ai temps dles invajions barbariches

Tl Ciastel dl Buonconsiglio a Trent él gnú daurí dantenier la esposizion "Veriers, prinzesc y eroes" che interesseia dessegur ence i Ladins ajache ala conta la storia de nosc raions da vedlamenter encá: da les prumes fusties dla persona dant da 30.000 mile agn enfin a les invajions barbariches. I esponac respiedla l’esibizion dla forza, dl domine y dl luxus de na elite che comanova enlaouta. I esponac archeologics vegn dal ampl raion che se desten anter les gran planures assoulcedes a sud dal flum Po y a nord dal Danube con anterite les Alpes desche liam natural anter l mond europeich dl nord y chel mediteran. I esponac é vegnus coius adum da de plu museums y colezions y  vegn prejentés per l prum iade deberieda alistés a na moda che ai fej revive la storia. Al é da vedei na ampla cerna de ermes rafinedes, de belijies costoules, de oles y de d'autri simbui particolars dla aristocrazia de chi temps. I ne podon nia nes desmentié che gran pert di raions sun la manciancia dl flum Isarch (Lijon - Eores - Funes - Cudon - Ciastel - Souc - Fié - Tiers - Neva Ladina) fova ladins enfin al 13-15eisem secul y aluesc plu die, l Venuost enfin al 18eisem secul.

Raprejentazion de n verier (retich?).



La mostra é daverta vigni dí, sclut fora l lunesc, da les 10.00 a les 18.00 enfin ai 7 de november 2004, na esposizion che al paia la mueia vedei. Ala é partida ite cronologicamenter enscí:


- prums segns de destinzion. Paleolitich, Mesolitich y Neolitich;
- l temp dl ram  y l meteman dl temp dl bron. Tl segn dl manarin y dl pugnal;
- dal temp mesan al temp tardif dl temp dl bron. Tl segn dla sabla;
- l temp dl fer. Eroes y apoteosa;
- l temp celtich;
- l temp roman. Les mersces di emperadours-dies;
- Auta Eté Mesana. L ciel sun la tera.

 

L sit internet dl Ciastel Buonconsiglio a Trent: http://www.buonconsiglio.it/starthtml.asp







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=731