L'artista da Urtijei, Thea Blaas, tla Slovenia

Esposizion "Artisc' zenza confins"  per enaudé l'entreda dla Slovenia tla Union Europea tl Ciastel de Grad Gornja Radgona

En venders, ai 28 de mei, da les 19.00 gnirál daurí a Grad Gornja Radgona tl Ciastel de Oberadkersburg tla Slovenia na mostra particolara endrezeda via per festivé l'entreda dla Slovenia tla Union Europea con 3 artisc'  en raprejentanza di 3 statesc, anter chisc Thea Blaas da Urtijei che raprejenteia l'Italia y chel con instalazions video,  Adolf Pen dla Slovenia con pitures y Thomas Rauch dl'Austria con scultures. Chisc dis fova laours de Thea Blaas da vedei tl Ciastel Marec a Bulsan y ala é una di 6 artisc' cernus da la juria per la Trienala Ladina, mostra d'ert dl Museum Ladin Ciastel de Tor. L'esposizion tl Ciastel de Oberadkersburg  romagn daverta enfin ai 30 de mei.

L Ciastel de Gornja Radgona, Oberadkersburg per todesch, á na longia tradizion. Dant da 10 agn él vegnú derturé  y enjigné ca dal ciastelier nuef Milan Herzog desche alberch y infrastrutura per congresc y esposizions.

Thea Blaas Artista, professoura de grafica y depenje a la scola d'ert de Urtijei.

curriculum vitae Studes tla scola d'ert de Urtijei. Stude d'architetura a l'université de Dispruch. 1989-1993 studes a l'Academia dles Beles Erts de Bera/Milan con l prof. Luciano Fabro. Diplom de pitura con lauda. Comembra dla Lia di artisc' de Südtirol; avisadessa dl grup "medias nuefs". Esposizions singules y coletives tl'Europa. Dl 1983 ála tout pert a la "Scola d'afrescs" con l prof. Robert Scherer/Salzburg y Bulsan, 2 agn de assistenza pro l prof. Robert Scherer. Daven dal 1997 avisadessa dla classa  "sperimentazions tla pitura" a l'Academia internazionala d'isté "art didacta" a Dispruch. Daven dal 1994 professoura de "Dessegné per depenje" tla Scola d'ert de Urtijei.