Conzert de Badiamusica
Data: 21 May 2004 da les 10:22:30
Tema: Manifestazions


 

N conzert a onour dl Sant Ojöp Freinademetz

Cor y orchestra dl dom da Persenon cianta y sona a onour dl Sant, ai 29 de mei tla gliejia de Badia

Badiamusica met a jì en gaujion dla festa a onour de S. Ojöp da Oies l conzert con l cor y l'orchestra dl Dom da Persenon. L conzert sarà en sabeda ai 29 de mei da les 21.00 tla gliejia de Badia. Al sonarà ence Franz Comploi (orghen) y al ciantarà Clara Sattler (sopran), Valeria Gasser (alt), Martin Gruber (tenor) y Gebhard Piccolruaz (bas) sot a la bacheta de Heinrich Walder.



Al é gnù envié l cor y l'orchestra da Persenon ence per sotrissé l liam che  l Sant Ojöp da Oies ova con chesta zité. Sant Ojöp fova ruvé a Persenon canche al ova apeina 10 agn y ova studié ilò per deventé preve. Al ova cianté plu iadesc tl dom de Persenon con l cor di mutons dl istitut .  Aldidancuei abelesc l cor plu gonot les messes a onour dl Sant. L cor enstes esistiva bele tl'Eté Mesana. I ciantadours dla Scola dl Dom da  enlaouta portova dant dantdaldut cianties gregorianes entratant messa. Con l dirijent de mujiga Ignaz Mitterer (1850 - 1924) é l cor  chersciù d'emportanza, se fajan conesce colonc foradecà. Adum con l'orchestra pòrtel  dant te conzerc dantaldut les gran messes per orchestra di classics vieneisc y  dl romantizism.

En sabeda a Badia gniràl porté dant les composizions sacrales de Mozart “Veni, Sancte Spiritus”, “Te Deum”,  la “Mariazellermesse” de J. Haydn y “Salve  Regina” de F. Mendelssohn.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=701