La mancianza de autonomia di Ladins
Data: 20 May 2004 da les 12:27:09
Tema: Politica


 

I ladins tles ciafes dla provinzia

Les prescions di todesc sun la politica, les istituzions y la scola ladina é enormes

de Willeit Carlo
 
Zenza lista Ladins a Bulsan podéssel florì la "fujion" todescia- ladina; lascedeme adoré chesta parola per desmostré a cie resultac tant fauc che l´identificazion clermenter voluda, propagandeda, sforzeda, anter todesc y ladins nes porta.


Pié via pionse da na situazion politica y sozio-culturala fata de n grum de simbioses plu co simetries. Sudtiroleisc é ciamò encuei conscidrés, ben a tort, demé i todesc y i ladins-SVP y SVP ladina, scola profescionala ladina y scola de mujiga todesch/ladina, biblioteches, bens culturai todesc-ladins y .... truepes d'autres strutures ence sozio-economiches aliniedes, met tla medema direzion y organisazion todesc y ladins. Chesta mancianza de autonomia y assoziazion al majer grup (nia decontra a la comunanza anter i grups, vignun con sia identité) comporta na integrazion tant sterscia dal pice tal gran che an ruva a la sparizion vigni iade can che an ruva dant a n contrast con l majer o ence demé en confront anter de maiours. L plu bel ejempl é dessegur la scola. Tla discuscion sun i lingac te scola sparesc l unich subiet che à dadie bele trei, cater lingac, la scola ladina. La "scuola trilingue"-talian, todesch, ingleis- y i biei descursc entournvia ignoreia la prejenza dai ladins y sia scola. Ma bela végnela pro discuscion sun la toponomastica. L’adoranza dl ladin vegn bele sburleda ite y su contra i joufs, magari scluc; olache les vals met man él ben rie da vedei valch de ladin. I scizeri tol la parola (al é sia plena rejon) per dì che i todesc ne vuel nia plu de entanc de inoms talians, ma la resposta de Durnwalder é steda na proa de tant che l "ladin" vel tla fujion-comunion todescia ladina. Plu dret co falé al dit, che ala ne va nia da tò demez inoms talians cherscius storicamenter, ma falé de fin àl dit che na pert de todesc y ladins zerca de i tò ju. Che ie sé, ne à i ladins, nience chi dla SVP, mai ghiré da tò ju duc o gran pert di inoms talians, ma demé ghiré l dret reconesciment di inoms ladins. Per giustifiché la politica de d'autri mess i ladins ence tegnì decà per i fai y les stritaries dai autri zenza cueie mez n frut per se. Sce al n’é nia dret tò demez inoms plu emportanc cherscius storicamenter, tant plu falé él mo mai nia tegnì cont, nia lascé pro, nia ti dé l dret post a inoms nascius storicamenter, chi ladins che fova dant i todesc y i talians."Ma chest é demé n problem ladin, nia ladin todesch!"







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=700