Miù müs a müs! Zacai mint y ne dij nia les cosses co che ares se sta in realté
de Lois Trebo
Che al é rî da mëte a jì incuntades danter rapresentanc de odüda politica desvalia nen é nia val' de nü, cis sce önn en grup fej pert dla maioranza y l'ater dla oposiziun nia orüda. Bele jö Roma pon osservé les gran dificoltês danter la maioranza y la oposiziun por rové adöm a se baié fora. Le presidënt Ciampi à tl ultim tëmp critisé plü gonot la mancianza da pert dal guern da se ürté con la oposiziun por baié y sciacaré fora problems de gran importanza. Al à dit che le debat politich é na infrastrotöra essenziala che se ghira ma la bona orenté da intrames les perts. Le dialogh danter maioranza y minoranza é le su tru por jì tla direziun de na vijiun plü leria di problems istituzionai. Le comissar europé Mario Monti à da püch te na intervista baudié che la mancianza de en debat politich tla Talia é en fatur che sprigora investimënc esteriurs da gnì tla Talia,olache al vëgn ciaré massa ai personalisms impede ales reformes.
Bel chëstes parores podunse ince adoré por nosta provinzia da Balsan, olache la maioranza arata con söa forza da podëi fracogné la oposiziun. A Balsan àn orü mazé tres na lege litala nöia zënza i ji adincuntra ala oposiziun che an ess tan adoré por la aproé. Gnanca na dezijiun dla curt costituzionala ne n' é stada na leziun por la maioranza. Al pö che ince i ladins i feji do a cösta borta scora de mür a mür. Desche esponënc dla lista Ladins â cunté, dê ester amez isté le dé fat fora por baié cun esponënc ladins dla SVP, mo püc dis denant à chi dla SVP desdit la incuntada con Lista Ladins, sciömia che al foss sté en tlapun de problems da baié fora por le bëgn dla popolaziun ladina. Te na intervista dan val' dis à l' assessur ladin Florìn Mussner dit che al é jü plü iadi da esponënc dla LL, mo che chisc n' é mai jüs da d' ël. Atlò ne sta cizé nia en pe, zacai mint, ne dij nia les cosses co che ares se sta en realté, sce öna na pert y l' atra s' la baudia dla medema mancianza de disponibilitè por se ürté ! Cösc se tignì fora n'é nia da capì. Rodunt sce an à idees desvalies él bojügn da se ürté por se baié y ciodi pa nia da s' les strité fora y dedô deboriada ji a tó n café. Chel se fa le mül ne i porta a degügn nia ater co paronc y desfidënza. Döt le monn se baia y se incunta sce an pënsa ala UNO, ala EU ez. y en zacotan de ladins n' é nia bogn da rové adöm tal medem formià ! Al mët man l' ann nü: öna dles aodanzes politiches ladines plü importantes é bëgn chësta: che i ladins dai dui partis LL y SVP se incunti vigni 3 mëisc por se baié fora i problems che degügn n'ais plü bria da ji dant la curt costituzionala o dan le TAR a fà avarëi ai ladins sü dëc co i speta y che le mür cuntra mür vegni rogosé da müs a müs.
articul te ladin standard
