Enrescida-internet: al busia dut entourn spies y spions
Data: 06 May 2004 da les 20:50:33
Tema: Tecnica: computer, internet y e. i.


 

Programs spions ruva adascondon te nosc computers  

90% de duc i computers coliés a internet é bonamenter infetés con programs spions / spyware - Cie ciàfien pa da fé?

(if) L provider american Earthlink y Webroot Software à publiché dacurt per l prum iade na enrescida sun i programs spions dantman te nosc computers. Tl ultim cuartal 2003 ài controlé n milion de computers y ei à registré y analisé passa 29 milions de programs spions, la enscidita "spyware", afustieda endlonch. De chisc fova zirca 23 milions „adware-cookies“, végnel sclarí tl comunicat.



"Adware" é dutes les sortes de software che ortia alasconeta tres internet informazions tl computer entratant che al vegn visualisé reclams. N „adware cookie“ é  n mecanism che registreia y analiseia spo adascondon l deport di utilisadours depierpul che ai navigheia te internet zenza che ai s’en anadae o che l adware se dae adentene.
 
Per l manager Matt Cobb dla Earthlink él n segnal dret festidiant che an ae giaté anter les "spies" ence passa 350.000 trojans, programs per la souravedlanza dl sistem operatif. Chisc trojans contegn virus: p.ej.  pòi dé inant plen control sun l computer a jent foradecà y arobé datesc.

I esperc de Earthlink sospeteia che le 90% di computers coliés a internet sie infetés con programs spions / spyware. Chest  „spy-audit-report“ dess vegnì dejout tl davegnì regolarmenter per avei zifres da paridlé. Travert de chesta ativité é chela de mostré su l deslargiament tres plu massif de spyware y de informé l publich di risesc. Ma bonamenter él viadedò tamben l interes de volei vene software/programs „anti-spyware“.

Per se stravardé dai spions dla rei pòn instalé programs anti-spyware y ativé l "firewall" sot a opzions de Internet-Explorer.

Deplù informazions a la plata internet: http://www.earthlink.net/about/press/pr_spyAudit/







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=679