Union Generala di Ladins: provinzia de Belun
Data: 22 March 2004 da les 14:51:50
Tema: Politica


 

L president Nani Pellegrini se damana n reconesciment ofizial dla Generela

Chest en basa a la lege cheder nazionala 482/99 che veid dantfora organisms de liam souraprovinziai per comunités de mendranza despartides 

de Lorenzo Soratroi

“Na politica che ne ciala nia inant enred puech”,  chest é l comentar de Nanni Pellegrini, president dla Union Generela di Ladins dles Dolomites, puec meisc dant les lites provinziales beluneises, per cie che reverda la politica per les mendranzes porteda inant da l'aministrazion dla provinzia de Belun con a cef De Bona. “Al é vegnù scrit truep tla stampa”, va inant Nani, “ma degugn se à mai damané, sce la Provinzia à fat valch per i trei comuns storics ladins, do che ai é vegnus reconescius enfinamai dal Consei Provinzial enstes desche tai”. Pellegrini recorda che la lege cheder sun les mendranzes 482/99 ti dà a les provinzies la facolté de individué la comunité olà che la mendranza é storicamenter enraijeda. Chesta azion à porté a avei ben 35 comuns che s’à declaré de mendranza ladina, ma baudi la unica cossa che gran pert vuel é i finanziamenc.



“Per ti dé atuazion a chesta lege ova l’aministrazion provinziala enlaouta enjigné ca na delibera, maneda a duc i comuns dla pert auta a na moda che ai se declareie ladins. Chesta azion à porté a avei ben 35 comuns che s’à declaré de mendranza ladina". "N comportament “, dij ciamò Pellegrini “, "che à fat storje l nes a trueps ambienc europeics competenc, desche l Eblul, l Ofize Europeich per i lingac de mendranza y la Fuev, l’Union Federalista di grups etnics europeics, per la prescia y la puecia motivazion che à condut a chesta delimitazion nueva dl raion ladin, che tol sen ite comunités de cultura y de storia truep massa desferentes da cheles bele reconesciudes y legitimedes”.

Desche President dla Generela messova Nani fé noté che la provinzia de Belun ne à nia ciamò reconesciù ofizialmenter chest organism de liam, sceben che chest sie prevedù da la lege cheder nazionala tl caje che les mendranzes é despartides sun deplù provinzies o regions. N auter pont neigher, tres aladò dla minonga de Nani a revert a la politica de De Bona, é chel de ne avei mai envié via na discuscion o n confront con la Consulta Ladina di trei comuns o con la Region che sporj i finanziamenc. Chest à condut a trueps problems al intern dla Federazion, tant inant che les unions ladines di trei comuns à messù zede gran pert di finanziamenc regionai ai neo-ladins. Nia avei fat chest descurs  à porté ence a l’istituzion di doi istituc ladins, chel dla provinzia y chel di trei comuns, che é gran spaterlament de finanziamenc, ma da l’autra pert à chest enfortí l liam y la colaborazion di istituc “Ciasa de Jan” con i Istituc de Badia y Fascia, condujan a la creazion de n triangul cultural anter les provinzies de Belun, Trent y Bulsan. “La politica dl’aministrazion De Bona", scluj via Nani, "à tres ponté plu sun la cuantité per fins litai che sun la cualité. I speron che chela nueva ne se desmentie nia dles raijes y dla storia di Ladins dl Sela y che ala reconesce i organisms de coordinament prevedus da la lege.”

 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=643