Aprovazion dl bilanz sburleda a jené
Data: 20 December 2002 da les 14:49:03
Tema: Politica


 

Willeit brancia do l'erma plu temuda: la votazion do grup etnich dl bilanz de previjion - El damana ence le sostegn per dertoré la Cësa di  Ladins zenza messei dé ju la proprieté ala provinzia

La scuntreda danter maioranza y mendranza se fej plu dura. Le rapresentant ladin y vizepresident dl Consei, dr. Carlo Willeit, ne à  nia dé pro le bilanz de previjion pro la ultima senteda dl Consei provinzial y s'à tignì a na prozedura veduda dantfora dal Statut de autonomia per sconé i interèsc de en grup etnich, te chest caje de chel ladin, sce el rata de ester vegnù traté nia endretura y ingiustamenter dala maioranza, te chest caje dala SVP. Do le mote ne ti jovel a Willeit nia plu traté cun la maioranza (SVP) cun "de beles manires" - vedú ence sciche al é vegnú metú l'assessour Florian Mussner unilateralmenter dala SVP. Willeit à sen brancé do a una dles mesures plu drastiches per fé capì y audì clermenter sia posizion.

Un di poms dla descordia. La Cësa di Ladins a Urtijei, la SVP  vuel na pert dla puscion per la provinzia tl caje dl conzediment de n contribut. La Lista LADINS é decontra.



Willeit à fat recurs a chesta poscibelté  do che sies propostes per sostignì la derturazion dla Cësa di Ladins (dlongia la costruzion dla ciasa per la joneza) y per sconé l'artejanat artistich, ne é nia vegnudes toutes in consciderazion dala maioranza SVP. Fé valei le dert dl Statut y  damané la lita aldò di grups linguistics, ne ti dan nia pro al capitul dl bilanz sun la cultura ladina, pervia di puec mesuns a desposizion, fova un di ultims mesuns per  fé audí sia ousc. Chesta erma á sen Willeit brancé ite.

La conseguenza: l’aprovazion dl bilanz de previjion é vegnuda renvieda ala senteda di 7 de jené, for che le plenum ne vegne nia cherdé ite bele denant. Entratan messarà la SVP se cruzié dla comiscion, veduda dantfora dal art. 84 dl statut d'autonomia, che ess bele daussù vegnì nomineda dan cater agn y che arà da se cruzié dl capitul contesté da Willeit: “strutures per ativités culturales y l servisc ai joegn tl lingaz ladin”. La ghiranza de Willeit à sciaudé valgugn comembri che à empermetù de ti la rete. "La SVP é tomeda pervia de sia posizion dura. Ti dé pro a mia proposta o ence demé la empermetuda dla Jonta provinziala de sostignì la Cësa di Ladins zenza pretene la puscion, ti essa sparagné al Consei provinzial d’autres sentedes per aprové le bilanz", dij Willeit, segur de sia dezijion.

La comiscion paritetica veduda dantfora dal art. 84 dl statut d'autonomia veiga dantfora  2 rapresentanc todesc (i inoms da pert dla SVP é bele vegnus fac tles persones de Durnwalder y Baumgartner), 2 rapresentanc talians, mo degun ladin, tolarà na dezijion lienta per le Govern Provinzial. Sce la comiscion ne giatessa nia na soluzion passa la chestion al Tribunal Aministratif.

 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=64