Na atraziun nöia sön Börz/Antermëia Data: 14 December 2002 da les 19:41:39 Tema: Desvalives
Maria Canins plena de laut per pista y scenar
A Antermëia, picera fraziun dl comun da San Martin, cun za. 300 abitanc y deplü strotöres turistiches, fôl bele da en pez che ara jô jöpert cun le turism da d'invern. I agn d'or dl '70 y '80 ê ma plü na bela recordanza inchersciora. A ponsé che le pröm implant va zoruch ai agn '60, cinamai dan Al Plan de Mareo. La gauja é stada la gran mancianza de nëi ala fin di agn '80 y problems cun i 3 implanc portamunt che condüj dal zënter dl paîsc sön Chi Jus/Munt da Tunzené. An n'â nia le möt da fà nëi. Fora dla meseria nàscel nia dainré indere ince scomenciadies nöies. Ti ultims agn àn plü y plü descurì le raiun dl ju de Börz, dötaurela nia dezipé da implanc portamunt, lascè dî sön na pert d'invern. Söl retrat: Pütia odüda da Börz. La loipa fej sü cërtli ti pres planis dessot (Sepütia).
Y an à metü man da remedié valch: impröma, dandadöt cun le sostëgn dl comun, àn arjigné ite en canun dala nëi por tignì altamo un en lift in funziun che scomëncia dal zënter dl paisc. Spo él gnü arjigné na pista da jì cun la liösa de za. 2,6 km de lunghëza da Börz jö cina jö Fornela. Y chësta ota dal scomenciamënt de dezëmber inant à Antermëia n'atra atraziun plajora da ofrì: al é gnü daurì ufizialmënter sön Börz ti pres da plan bel sot le maiestus crëp de Pütia na loipa de paslunch de za. 6 km de lunghëza. La nëi é garantida a chësta altëza de za. 2.100 m codî ite por l'aisciöda. Y al ne vëgn por intratan damané degun paiamënt por anuzé la pista bun batüda da en iat dala nëi aposta. I un incunté Maria Canins sön pista, cun om y fia, y ara ê plëna de lalt por pista y scenar. La pista se barata jö morjel cun toc da plan, da jì lisiermënter söpert y jöpert, dìjera, ideal. Da scenar fej i parëis de Pütia che s'arvërj impuntassö, les Odles de Eores y la odüda da Plan de Corones cina al Corn de Renun. L'insoredlaziun é tratan döt le dé buna. Y sön Börz él ince döes üties davertes tratan l'invern: la ütia de Börz ingrandida chësta ota y la ütia Cir.
A Antermëia, picera fraziun dl comun da San Martin, cun za. 300 abitanc y deplü strotöres turistiches, fôl bele da en pez che ara jô jöpert cun le turism da d'invern. I agn d'or dl '70 y '80 ê ma plü na bela recordanza inchersciora. A ponsé che le pröm implant va zoruch ai agn '60, cinamai dan Al Plan de Mareo. La gauja é stada la gran mancianza de nëi ala fin di agn '80 y problems cun i 3 implanc portamunt che condüj dal zënter dl paîsc sön Chi Jus/Munt da Tunzené. An n'â nia le möt da fà nëi. Fora dla meseria nàscel nia dainré indere ince scomenciadies nöies. Ti ultims agn àn plü y plü descurì le raiun dl ju de Börz, dötaurela nia dezipé da implanc portamunt, lascè dî sön na pert d'invern. Söl retrat: Pütia odüda da Börz. La loipa fej sü cërtli ti pres planis dessot (Sepütia).