Azessours al computer: l marcé pro enjigns LCD
Data: 21 January 2004 da les 21:38:40
Tema: Tecnica: computer, internet y e. i.


 

Monitors a cristai licuids à sen la souraventa

Tres majera la domanda do monitors a cristai licuids (LCD) - Ai adora puecia lerch y sporj de mioures imajes

(if) A livel mondial él vegnù venù entratant l ann passé monitors a cristai licuids per n valour complessif de passa 35,7 miliards de dolars. La perzentuala de chersciuda fej fora do i archiridours de marcé feter l 28%. Chest aument vegn splighé con la majera domanda do monitors a cristai licuids per personal-computers, notebooks, ma ence per televijions con n monitor LCD. I trei produtours de LCD sudcoreans LG.Philips LCD, Samsung y BOE Hydis Technology à adum souravarié l ann passé per l prum iade l lim de 10 milards de dolars. LG.Philips LCD, l mairent produtour a livel mondial, à arjont da soul n rode de afars de 5,12 miliards de dolars con monitors LCD de grandezes soura i 10 polesc. En chesta outa se aspéten n auter aument dl 32% a ben 42 miliards de dolars.




Ma ciugn é pa perdret i gran vantajes de chisc enjigns a  cristai licuids (LCD)? I vantajes prinzipai é la auta cualité dles imajes, la puecia lerch che ai tol ite y al toma daldut demez les raiazions, ajache les imajes y i colours vegn generés ti cristai. Enfin a sen fòvel dantdaldut i cosc’ cotant auc che ova impedì n gran suzes de marcé en confront de monitors tradizionai che funzioneia sun la basa de na catoda. I priesc é sen ence plulere calés. Enscì giàten ence chilò da nos n monitor LCD a 17 polesc bele sot ai 300 euro.

*mairent=l majer, l miour







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=557