Smendrì l trafich sun i joufs
Data: 13 January 2004 da les 15:35:48
Tema: Aministrazion


 

Mioré l trafich tles valedes y soura i joufs de Frera y Sela

Ombolc y reprejentanc di consorzes turistics de Badia y Gherdeina pro meisa con l assessour Florian Mussner - De merz 2004 vegniràl prejenté l stude dla EURAC

(osp) L fin primar dl’enconteda anter ombolc y reprejentanc dl turism dla Val Badia y de Gherdeina  con l assessour Mussner chest fin d'edema fova chel de brancé ite n iade deberieda i problems dl trafich tles valedes y anter les valedes soura i joufs. L assessour à sotrissé che la manutenzion dles stredes soura i joufs é vegnuda mioreda. Entratant chest ann se festidiaràn de mete su rempars contra les levines sun la cleva badiota dl Jouf de Frera. Te vigni caje, sun chest fova duc a una, ne vuelen nia deslargé les stredes soura i joufs per sconé la natura. Dla medema minonga fòven ence che al va debujegn de n regolament nuef per l transiament sun les stredes de Frera y Sela. Al é vegnù debatù deplù variantes che va da ghiré transiadura per furné enfin a mete a jì linges de trasport publich che transieia vigni 20 menuc con les infrastrutures corespondentes. Tl’enconteda él ence vegnù a lum che an ne volessa nia saré defin i joufs.

Sun l retrat: l assessour Mussner pro l’enconteda con i ombolc y i reprejentanc dl turism de Badia y Gherdeina. (Foto: osp/Arno Pertl) 



Te n convegn a clausura, ai prums de merz, vegniràl prejenté ai ombolc y ai reprejentanc dl turism l stude sun l moviment di auti fat da l’Academia Europeica EURAC de Bulsan. Deberieda con l assessour al trafich Widmann cialaràn spo giaté na soluzion. En gaujion de n’autra enconteda, preveduda ai prums de messel 2004, deberieda con i raions vejins (Fascia), vegniràl ciamò n iade rejoné de na regolazion dl trafich soura i joufs selans. L moviment motorisé tles valedes ladines, che se empifa tres endò entratant la sajon auta, dess vegnì mioré ti proscims agn ence con valch miories: la streda de zirconvalazion de S. Cristina vegnirà scomenceda dl 2006. Per la fin dl 2005 aràten de avei sclut ju i laours sun la streda dla Val Badia y de avei scomencé les miories sun la streda de Puster y l'incroujeda con la Val Badia. Les miories dles stredes comportarà ence n miorament dl flus dl trafich, ma empò dess les valedes cialé che l trafich sun streda cale y stravardé l ambient, à dit l assessour. Una na poscibelté fossa chela de renforzé i servisc de corieres desche l skibus, y de anuzé cotant deplù i implanc portamont d’isté: (LS:if)





L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=542