La declarazion de Govern y i LADINS
Data: 17 December 2003 da les 08:22:37
Tema: Politica


 

Carlo Willeit: "Ciuldì ne végnel pa sen nia cherdé n assessour da fora?"

Ladins vegn nominés te apeina 7 risses - Al vegn rejoné de revalutazion dl lingaz ladin, ma la declarazion ne é nia vegnuda metuda ju per ladin

"Sun l general, puech de concret, apeina valch da nuef", enscì carateriseia dr. Carlo Willeit la declarazion de govern dla Jonta Provinziala. "Pertes longes é scemplamenter vegnudes sourantoutes da declarazions da dant o descriv situazions atuales. Con n cert interes pòn osservé i ponc: agentura de lingaz, la autonomia finanziara, les tarifes tla sanité, les prestazions soziales, toponomastica y problems de transit", vàl inant. "Truep massa puech végnel depierpul dit soura familia, joeneza y mutons. Per cie che reverda i ladins contegn la declarazion de ben 43 plates apeina 7 curtes risses".



Ma almanco pèr cie che é contegnù azetabel y al respiedla ghiranzes dla lista Ladins: raprejentanza di ladins, reconesciment y revalutazion dl lingaz, radio y televijion, retuda di scioldi dl frabiché alesiré olache l grup ladin à trat a la curta, sostegn a la colaborazion anter i ladins y e.i.". Aldò de Carlo Willeit essa la mendranza ladina endere messù vegnì nomineda aposta ti capitui: sussidiarité istituzionala, reforma dla lege litala, reforma dla scola, promozion culturala y toponomastica.

An ne afustia iniò na spligazion ciuldì che la vize-presidenza dl Consei Provinzial ne vegn nia corida dal raprejentant ladin lité, sen che la cherdeda de n assessour da defora é poscibla. L foliet Dolomiten ne à nia dit che les raprejentanzes dla aministrazion ne sarà nia independentes. L president Durnwalder ne se à nience tout la bria de audì i Ladins denant che mete ju l program", dij Willeit. 







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=518