Fascia fata conesce tres dessegns sun la Cesa Bernard
Les pitures de Virgilio Soraperra che conta la storia de Fascia da zacan sen ence te n liber
de Marta Chiocchetti
"…fosc aràn n dì plajei de recordé chestes cosses". Enscì se fenesc l liber prejenté en domenia, ai 30 de november da les 16.00 domesdì tl salf ploanal de Ciampedel. "Cesa Bernard Haus" é l titul dl laour porté inant da Mario Bernard Tabac, gustoul impresar, nasciù a Ciampedel y enciasé oramai da agn a Cianacei. L domesdì se à daurì con l salut dles autorités per jì inant con na ‘performance’, tegnuda da Annelise Vian che, con n pue de batecuer desche ela à dit dantfora, à sapù dè n corp y na anima a n grum de plates.
La brava prejentadoura de Radio Studio Record à depent n cheder scempl dl contegnù dl liber dijan che chest ultim é na preziousa storia dla Val de Fascia. De beliscims dessegns ti dà moviment, colour y dinamism a la fazeda de Cesa Bernard che ciala envers Ciampedel, autour de chisc dessegns é Virgilio Soraperra dla Zoch, capaze depenjadour autodidatich da Cianacei.
Dant plu de 30 agn ova Mario Bernard palesé al artist, sie gran amich, l dejidere de ti dè na paruda nueva a sia ciasa. Virgilio à azeté y à fat chel che an veid ruvan ta Cianacei. Con sie blot gust, sia fantasia y do se avei dé jù con n gran laour de enrescida storica y culturala à fat Soraperra conesce miec nosta valeda, atravers i dessegns di laours da zacan, dla vita de duc i dis, dla jent omla y de renom che à fat n toch de Val de Fascia. Cesa Bernard é n liber de gran spessour olache l aspet geografich y naturalistich se mesceida con chel storich y folcloristich.
L’empegn dl autour dl liber é vegnù sostegnù da n muedl de persones che se à preferì enstesc dan sie contribut. L druchè ju les plates, l scrive ju y traslatè i tesc’ dlongia les enrescides storiches y geogrfisches a damané dai colaboradours truep temp, laoran te chisc ultims valch outa ence de nuet, do veies. "Cesa Bernard Haus" é n liber olache l dessegn à na valuta linguistica, de comunicazion de valours. Les figures à n significat alegorich y metaforich. Lieje chest liber ne sarà nia demé n plajei ma nes darà l muet de ester enstesc testimones dl’identité dla jent fasciana, dles struscies che nosc vedli à messù fè per avei zeche tla man y di gragn varesc fac per ruvè enfin encueicondì. Y i podaron recordè con plajei chel che é sté dant da nos.
