L grup miscionar Freinademetz saluda i miscionars fascians
Chi che volessa fé na esperienza tles miscions pò se mete en contat con l grup
c.g. L Grup Miscionar Sant Ojöp Freinademetz se à enconté te sia senta a Pera con i 2 fredesc miscionars dl Malgher da Poza, la monia Gisela, 76 agn, miscionara tl Ecuador y pater Raffaele, 68 agn, miscionar tl Uganda recordan che i fredesc misconars dal Malgher fova de 5 , de chisc é doi morc dant da puech, pater Carlo y pater Vittorino, entramidoi miscionars tla Africa. L auter é pater Alberto miscionar tl Ecuador.
L grup miscionar Freinademetz à volù i saludé dant che ai vae derevers tl Ecuador y tla Africa y scuté su da ei enstesc les ultimes nueves da les miscions olà che ei laora y per vedei cie che l grup ciafia da fé per i daidé. Bona l’idea de mané tl Ecuador poc de guant, à dit la monia Gisela, ciamò mioura chela dl finanziament de valch adozion da dalonc. "Ma miec de dut y cie che me fajessa gran cuer", à dit sour Gisela, "fossa che valgugn de Fascia vegnissa a me ciaté, a vedei con si uedli la realté dla miscion." Entourn la proponuda de jì tl Ecuador, tla capitala Quito, é l grup miscionar do a mete ju n plan per chest isté che vegn. Sce valgugn essa tl cef de daidé o de fé na esperienza te na miscion pòl cherdé su Loretta Bernard per informazions, tel. 0462.760019. Dl Grup Miscionar Sant Ojöp Freinademetz à bele fat valch meis de volentariat miscionar Loretta Bernard, Martin Bernard, Ivano Winterle, Gianni Casari, Laura Ciaghi y Nicola Locatin.
