Les e-mails refudam

L SMTP una dles gaujes prinzipales dl fenomen dl "spamming" (messajes refudam)

(if) Duc chi che à na miscion e-mail conesc l problem dla posta refudam che ti ruva demeztroi te crignola dla posta eletronica sun l computer. Suzanne Sluizer laora encuei a la "Universty of New Mexico" y se definesc enstessa“la ava“ dl SMTP, che vuel dì: "Simple Mail Transfer Protocol", l protocol de trasmiscion sun chel che al se baseia dut l engiame de messajes de posta eletronica tres internet. Tl 1981, can che ala fajova pert dl staff tecnich dl "Information Sciences Institute“ dla “University of Southern California" òvela partezipé a la definizion y al svilup dl MTP, l prezedessour dl atual SMTP. Te na intervista deda dant da puech àla declaré che l problem afonz dla difujion a na moda tant saurida dl spamming é propi da vedei tl contest de svilup dl protocol enstes.

Dant da passa vint agn ne esistòvel nia ciamò l  internet desche nos l conescion encuei, al esistova n valgunes reis ti  Stac Unis y n zacotant de grops de reis tla  Europa, praticamenter duc manejés da universités y zentri de archirida. Duc adum formova n centené o magari  mile sitesc dla Arpanet (prezedessour dla rei mondiala  dl internet) che ova demé finalités scientifiches. Can che an à inventé n sistem per ortié messajes eletronics ne se imaginova degugn che tl davegnì fòssel sté meso da pert de n programadour de virus informatics de mané fora tl medem temp milesc y milesc de mails a  milions de utilisadours o fé reclam tres e-mails, manan fora milions y milions de e-mails te puec seconc. L problem dl SMTP - à splighé Sluizer - é che chest protocol é massa fident. Degugn ne ova  pensé enlaouta de mete ite n mecanism de autenticazion dla identité per la posta che va fora. Y enscì crei l protocol de trasmiscion plu adoré al mond “a dut chel  che an ti conta”. A chesta moda él poscibel che n mut ortie a inom, per ejempl dl President di Stac Unis, messajes encantourn. L problem, desche an sa bele da giut, é imens. AOL (America Online, un di majers providers de internet) à declaré de avei bloché de auril  2,4 miliarc de e-mails refudam (spamming) te n di soul y i  esperc rata che l volum di messajes nia dejidrés ae arjont  l 50% dl trafich total. Sce duc é a una de vedei ite la gravité dl problem, ne é endere nia duc a una sun les soluzions proponudes per fé zeche decontra. Al esisteia doi trois: mioré l SMTP con valch che auza la segureza o l remplazé con n protocol scrit ex-novo. Paul Hoffman, diretour dl "Internet Mail Consortium", miena che na soluzion potenziala esisteie bele y mostra sun les  poscibeltés de fé funzioné l SMTP sun la basa de SSL/TLS che é vegnù realisé da la "Internet Engineering Task Force". Ence Rodney Tillotson, responsabel dl "Anti-Spam Working Group" per l consorz europeich "Reseaux IP Européens", pesima entourn les poscibeltés de mudé protocol: al volessa dì, modifiché n valgugn milions de servers soura dut l mond. Sluizer é endere dla minonga che "sie” SMTP sie dldut da engiamié, ajache al ne ti é nia sté do a la evoluzion tecnica che ela tingiova (dejidrova). An essa abù la ocajion de l fé efizient, ma ajache an é ruvés a chest pont, messéssen sen l modifiché te n grumon de pertes; al fossa massa compliché y al ghirassa true massa temp y bries en confront de svilupé n protocol nuef. La soluzion per evité problems de incompatibelté anter i doi mecanisms entratant l temp de sostituzion fossa chela de fé convive tl medem temp l SMTP y l protocol nuef. Depierpul proa  fora i tecnics vigni troi che al é meso per bloché la posta nia dejidreda. Ma n valgugn servers aplicheia gonot filtri massa restritifs y risc’ia enscì de compromete la arjonjibelté di anuzadours. Sce vost server azetassa demé i messajes de  anuzadours conescius, co fajessa pa per ejempl n vost vedl compagn de scola che i ne eis nia plu audì da vint agn a ves mané na e-mail per organisé na enconteda? I vedaron ti proscims meisc cie streda che an tolarà: scrive n protocol nuef o adaté chel esistent.