I ciafons vegn dauris y les rodes se muev

En domenia ai 3 de aost vegniràl endò organisé la Festa di Molins a Lungiarü. An podarà vijité i molins restruturés olá che al vegn majené siala y forment  y desclofé orde

L'Union di Studafuech da Lungiarü organiseia ence chest ann la "Festa di Molins" tla bela y enciantoula Val di Molins dlongia la vila da Seres itensom Lungiarü. La manifestazion scomencia da les 10.00 dantmesdì con na  S. Messa zelebreda alalergia y acompagneda da la Mujiga da San Martin de Tor.
Do messa podaràn vijité i molins restruturés dant valgugn agn. L'ega frescia dl ruf de Seres vegnirà outa tles roies y les gran rodes da cops metarà endò man da se mueve per mené i enjigns dl moliné te ciasota. La Mujiga da San Martin de Tor tegnirà depierpul n pice conzert per i vijitadours y da seira via podaràn ciamò ascuté su  mujiga da entrategniment  y passé enscì n bel di d'isté.

Per la orela curta fistideia ence i verdaparcs dl Ofize Parch Natural Puez Odles che met a jí chesta outa  juesc, animazions y stomac per tripé pici y gragn. Al vegnirà ofrì da mangé y da beive y an podarà ciarcé valgunes spezialités da paur. Sce al essa da ester rie temp vegnirà la manifestazion sburleda a la domenia do.

Co che l orde deventa panicia

Sun l ruf da Seres él vegnù restruturé 9 molins. Pro valch molins pòn osservé particolarités tecniches dret interessantes: sce la majera pert di molins à demé una na roda da cops, ne él pro d'autri does. Chesta seconda roda uega da mené les piles, n sistem da majené, olà che la blava vegn pesteda su te n droch da piles de legn. Pro un n molin sun l ruf da Seres giáten n pestin, na sort de droch toron de granit con laite does moles arvertes su y amez tachedes adum con na assa de fer. Tres l moviment zircolar dles moles vegn i graniei de orde pestés su y desclofés y enscí fat adenfora panicia. (Informazions toutes dal liber: La Roda dl Temp de Giovanni Mischí y Mario Clara,pl. 29 y n liber  da aconsié ).

(if)