N sit da aconsié www.ladinia.it
En domenia, ai 13 de messel, vegnirál tizé ite la Ciaucera ta Lungiarü
Oramai él truepes plates te internet persoura la Ladinia y les Dolomites. Una endere é particolarmenter interessanta y da aconsié. Al se trata dl sit a funzion de informazion y reclam turistich a la miscion www.ladinia.it metuda adum da Mario Clara da Lungiarü con sia firma Madem Design. Al vegn dé informazions soura l raion, les poscibeltés de alberch, soura l agriturism, soura i artejans y i sorvisc che vegn pités ti paisc dl comun da San Martin. En plu él ence n calender dles manifestazions sot "news" olache an po lieje anter l auter che dal 13 ai 20 de messel vegnirál tizé ite la Ciaucera/Cialciara renoveda ta Lungiarü per desmostré sciche an brujova ciauc dandavia. Dlongia n grumon de informazions reporta Mario Clara, ence fotograf, de biei motifs che el enstes á fat ju tl raion.
Ite ensom Lungiarü a Seres, dlongia Tlisöra, él vegnú renové la vedla Ciaucera/Cialciara, tl ladin dla Val Badia, una dles pueces lonc y lerch. La iniziativa é steda dl comun da San Martin sun iniziativa de sie assessour a la cultura Mischí Giovanni. Dai 13 ai 20 de messel 2003, tl cheder dl program da d'isté dla Assoziazion turistica de San Martin, vegnirál fat na desmostrazion desche an brujova ciauc zacan. La ciauc vegniva delegheda da les peres da ciauc che an giata atira dlongia y che vegniva trasportedes tla Ciaucera a pé o con ciars. La Ciaucera vegniva adoreda deberieda da duta la vijinanza che se cruziova ence dl dertorament. Tl out dla Ciaucera renoveda él da vedei ence dutes les vedles massaries che jiva debujegn per fé chest laour. Sun iniziativa dla Assoziazion Turistica da San Martin vegnirá la Ciaucera en chesta outa per l prum iade, do trueps agn, endň tizeda ite. Chesta prozedura dura 3 dis y 3 nuetes endolauter. An podará tó pert a dutes les prozedures: coche les peres da ciauc vegn metudes ite, coche ales vegn brujedes y enultima coche la ciauc vegn trata fora. L fuech vegnirá empié en domenia, ai 13 de messel da les 12.00, tl cheder de na picera festa con mujiga y benedizion dl preve. Sun la foto: la Ciaucera/Cialciara renoveda a Lungiarü.
