"Kunstdenkmäler Ladiniens" de Eugen Trapp - Prejentazion ai 2 de jugn, da les 18.00 tla Cesa di Ladins a Urtijei
de Ulrike Frenademetz
Al se trata dl prum liber che prejenteia i monumenc architetonics y monumenc d'ert che é da giaté tles cinch valedes ladines dles Dolomites. L storich d'ert Eugen Trapp laora tl ofize dl archif y dl mantegniment di bens culturai a Regensburg. Al à bele scrit n valgugn libri soura l'ert dl temp modern. Dal 1987 àl metù adum libri y articui che reverda la storia dl'ert ladina. Chilò él da recordé les publicazions soura i artisc' Dominik Mahlknecht y Domëne Moling y i articui publichés tla revista "Ladinia", publicazions dedes fora dal Istiut Ladin "Micurà de Rü".
L autour é jù te vigni valeda ladina da paisc a paisc, se studian ju con gran lezitenza monumenc artistics che al à descrit spo tl liber, se fajan daidé da jent competenta dl post. Per vigni valeda féjel dantfora na picia prejentazion y dapò descrìvel naouta les operes de ert sacrala y dedò les operes profanes y les costruzions publiches de vigni paisc. An giata laite ence la descrizion di anteriuei y de chisc nen él scialdi trueps fora per les valedes ladines. L liber vegn abelì da 520 fotografies a colours fates da Lois Kostner. L liber "Kunstdenkmäler Ladiniens" vegnirà prejenté en lunesc, ai 2 de jugn, da les 18.00 tla "Cësa di Ladins" a Urtijei. (LS: if)
