La storia dl museum à ciamò da vegnì

Egon Vinatzer à cherdé a na senteda per clarì les chestions

En juebia seira à l president dla Union di Ladins de Gherdeina, Egon Vinatzer, cherdé ite na autra senteda per clarì les chestions davertes entourn la Cesa di Ladins a Urtijei. La enconteda é steda tla Cesa di Ladins y a la senteda à tout pert l assessour Florian Mussner, l aconsiadour provinzial Carlo Willeit, l assessour regional Gino Fontana, l ombolt de Santa Cristina Bruno Senoner y l ombolt de Selva Roland Demetz. Al manciova l ombolt de Urtijei Konrad Piazza che fova tl forest, ma al ova asseguré n sie raprejentant che ne se à endere nia prejenté. Sun l retrat da manciancia: Florian Mussner, Carlo Willeit, Gino Fontana y Egon Vinatzer, 4 cefs n iade a una.

Al é vegnù rejoné dla proposta de n proiet cotant mender, passan da 8 milions de euro preventivés a 2,5 milions de euro da sen y en pratica él demé vegnù rejoné de deslargé l fabricat dla Cesa, zenza toché l problem dl museum de Gherdeina. L museum à si problems de aministrazion y de conservazion che à debujegn de na conscidrazion speziala. Na cossa é segura che deslargian fora la Cesa saràl spo ence plu lerch per l museum che podarà bonamenter avei na aministrazion despartida. Sibe l assessour Mussner che Willeit é a una che chest proiet à te chestes dimenscions poscibeltés de vegnì finanzié ence con n contribut dla provinzia, davia che la zifra é cotant plu picera. L assessour regional Gino Fontana à tamben asseguré sie sostegn finanziar da pert dla Region. Al ne pò nia ciamò garantì al 100% n finanziament, ma al fajarà dut l poscibel per l avei. Duc i partezipanc a la senteda fova scialdi contenc dl resultat dla discuscion y duc canc fova a una de realisé l proiet de ampliament dla Cesa. La cossa per ence realisabla ajache an lascia da na pert l problem dl museum y an pensa demé a la Cesa che resta de proprieté dla Union di Ladins de Gherdeina. La storia dl museum à ciamò da vegnì.