Envit a ombolc, assessours y funzionars de partí al Felsenkeller
Data: 22 May 2003 da les 20:51:46
Tema: Politica


 

Te cianeva dal vin a se beive n got!

La Lista Ladins met depierpul adum tl chiet si 35 candidac, spo prejentazion spetaculara

L temp prelital ne deventará per i Ladins tla provinzia da Bulsan de segur nia da stufé chesta outa. Na enconteda politica ciacia l'autra, inserzions y comunicac jola encantourn. La Svp"ladina" conduj i maiours capi todesc ite per les valedes a la sostegní y a la daidé convence la jent. Pro les sauridanzes de n assessour sot a les ales de Durnwalder auda ence la poscibelté de podei fé n envit ofizial de vegní tl ciulé o tla cianeva a Laimburg a se beive n got de vin deberieda. Enscí va inant l laour de promozion litala dl candidat dla Svp, Florian Mussner. Propi chisc dis ti él vegnú mané fora l envit a ombolc, assessours a la cultura y ai assessours a les stredes di comuns ladins sciche ence ai funzionars de partí (Svp "ladina") de vegní ai 3 de jugn da les 19.00 tl conesciú "Felsenkeller" a Laimburg. Al ti vegnirá tenú su da beive y da mangé.



Chest l contegnú dl envit daté ai 16 de mei 2003 ortié fora dal assessorat: "Stimá esponënc politics ladins, i á le plajëi de ves invié a na incuntada conviviala cun vijita dla cianoa dla Laimburg en mertesc, ai 3 de jügn dales 19.00. Al tolará ince pert le Presidënt dla Provinzia dr. Luis Durnwalder. Al dess chësta ester na ocajiun da sté n pü adöm y da se la cunté sön argomënc desvalis. Speran da podëi Ves saludé en chësta ocajiun, ves salüdi bel intratan. Firmé, l Assessëur per i lëures publics, scola cultura ladina, Florian Mussner." Al resta la domanda, páiel el de persona o va dut sun l cont dla man publica?

Entratant che la Svp "ladina" se conzentreia sen sun sie soul candidat y proa da imprescioné con i gragn capi dla Svp todescia entournvia, é la Lista LADINS tl ruvé de mete adum si 35 candidac, musc nuefs da Gherdeina y da la Val Badia végnel encondé y ence valch candidat todesch empera.  Al ne vegn fat ciamò degugn inoms de chisc, ence per i sconé eventualmenter da certes telefonedes de prescion. Prejentazion spetaculara canche an sará tant inant. Deplú detais ne vuel i organisadours ciamò nia descurí. (ac)

 

Valgunes informazions sun l  "Felsenkeller" (l ciulé tl crep) a Laimburg per chi che ne savessa ciamò nia cie che al é:

A la fin di agn '80 ova la Cianeva dal Vin Provinziala debujegn de na majera lerch per podei enjigné ite n ciulé nuef con botes de len y n ciulé nuef per angostares (bozes) dal vin. Ajache la Cianeva dal vin a Laimburg sot Bulsan é fata su permez al crep, án tout la ocajion per foré inant tl crep i salfs nuefs che jiva de uega per l ampliament. Con la forza de 5 toneledes de dinamit él vegnú sclopeté ciará l porfir ros-cuecen dl "Mittelberg", l toponim dl dos che despartesc l Unterland dal Überetsch. Enscí án fat lerch a n ciulé de botes y a n ciulé de angostares (bozes) te chi che al é na temperatura naturala costanta. En plu án sclopeté ciará n salament  de 300molache al vegn prejenté te ocajions ofiziales l raion dal vin de Südtirol; foradechel végnel adoré sciche salf de raprejentanza dl Govern Provinzial. L plan per l ciulé é vegnú enjigné dal geom. da Bulsan Nori Gruber. Les does statues de bron da jí ite é vegnudes cheriedes dal artist gherdeina Guido Anton Muss. Les does figures raprejenteia l'eleganza sotila y megra y l vin sterch y corpous. L "Felsenkeller" ne é nia davert al publich. (Informazions toutes da http://www.laimburg.it)








L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=258