Prejentazion de does publicazions nueves
Data: 31 March 2003 da les 13:59:29
Tema: Cultura


 

"Breve storia della lingua e della letteratura ladina"  de W. Belardi y "Plurilinguismo e Scuola Ladina" de R. Verra

En mercui, ai 2 de auril, da les 17.00 végnel metù a jì a Persenon tla Faculté de Scienzes dla Formazion (str. Dante 4) la manifestazion "Lingua e società nell’area ladina", olache al vegnirà prejenté les does publicazions "Breve storia della lingua e della letteratura ladina" de Walter Belardi, 2a edizion, y "Plurilinguismo e Scuola Ladina" de Roland Verra. Belardi se à dai agn 50 dl secul passé interessé de chestions che reverda l lingaz y la cultura dla popolazion ladina entourn l Sela y à ence tout posizion sun l ladin standard ultimamenter.



L prof. Walter Belardi é conesciù tl mond ladin y foradecà per sies truepes publicazions y articui de linguistica. Al é sté professour de glotologia generala dal 1951 tl "Istituto Orientale" a Napoli, spo professour ordinar dal 1956 al 1998 tla Université de Roma, sen él professour fora de servisc tla Faculté de Letres y Filosofia tla Université de Roma "La Sapienza" . Al é member nazional dla Academia nazionala di Lincei.
Belardi se à dé ju per agn con la teoria de deplù disciplines linguistiches. Al à publiché studes soura l pensier filosofich grech antich entourn l lingaz (Platone, Arisotele, Stoics), soura l pensier di gramatics grecs y latins, soura i lingac classics, l’armen y i lingac iranians antics y medievai. Dai agn 50 dl secul passé s’òvel interessé de chestions che reverda l lingaz y la cultura dla popolazion ladina entourn l Sela. Anter sies publicazions te chest ciamp él l "Profilo storico-politico della lingua e della letteratura ladina" dé fora tl 1994. Deache chest liber é dret damané y apriejé dai letours, ti à l Istitut Ladin "Micurà de Rü" dè l’enciaria a Belardi de enjigné na seconda edizion ajorneda y plu curta. L liber- per talian- é n strument de conescenza dla storia dl lingaz y dla leteratura ladina, ence per chi foradecà. L liber contegn na enjonta de Marco Forni che rejona de aspec dla leteratura ladina dolomitica contemporanea. L autour dl vocabolar Tudesch-Ladin de Gherdeina mostra su che la produzion leterara y culturala da encuei é busienta y interessanta. Al recorda les revistes "Sckat" y "L Brunsin", l "circolo" (Lia Mostra de Ert) a Urtijei che tolova su movimenc artistics de avanguardia y ti lasciova lerch ence a la satira politica. La revista "Tras", che vegn fora dal 1994 vuel -con si contribuc plurilinguistics- jì soura i confins geografics y personai fora- sciche bele l titul dij.
Forni auza fora i "DIS de leteratura, teater, ert y mujiga" che vegn metus a jì vigni doi agn y é apriejés tres deplù dal publich. Al scriv spo dla "Lia Scritours Scurlins", na lia de scritours ladins y nia-ladins che à dé fora la publicazion leterara "Eghes - Movimenc tla leteratura ladina aldidancuei / Bewegungen in der ladinischen
Gegenwartsliteratur / Movimenti nella letteratura ladina contemporanea" y che à metù a jì ence performances teatrales. Plu inant végnel nominé l’ "Union Scritours Ladins Agacins" y i autours ladins plu conescius .
L’autra publicazion che vegnirà prejenteda en mercui a Persenon é l codejel de Roland Verra. L intendent dles scoles ladines descriv l svilup storich y la situazion atuala dl sistem scolastich paritetich dles valedes ladines dla provinzia de Bulsan. El mostra su te ciunes direzions che la scola pò jì y fej propostes de soluzion.


Al rejonarà Marco Forni, Leander Moroder, Theodor Rifesser, Roland Verra. L’organisazion é dl Istitut Ladin "Micurà de Rü", dl’Intendenza Scoles Ladines y dla Université Ledia de Bulsan.
(if)







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=204