Na burta vertola
Data: 13 November 2002 da les 19:45:37
Tema: Politica


Stimeda Redazion, complimenc per l sit web, na scomenciadiva che arichesc l panorama informatif y cultural dla Ladinia.

Ie n'é nia ciamò abù dlaorela de ti cialè ju avisa a les plates desvalives che ti vegn pitedes ai letours; i me tolarà la bria de fé valch osservazion y proposta plu inant. Una na cossa volessi dì atira: ie son dldut a una con la Redazion che i comunicac de n partit "ladin" vegne manés ite y publichés per ladin.



N moviment politich che se autodefinesc "ladin" ma che dà fora sistematicamenter comunicac adressés ai ladins per todesc n'é nia demé na contradizion (SVP ladina che comunicheia con i ladins per todesch) ma na "Zumutung". La spligazion che l partit n'à nia dlaorela de scrive per ladin n'é nia auter che na bela (o miec na burta) vertola: duc sà pu che canche an ne vuel nia ne àn nience dlaorela. I raprejentanc dla SVP, todescia y/o ladina, é n dì scì y n dì no ite per i paisc ladins; sce chisc gran capi, che à dessigur n grum d'autres cosses emportantes da fé, se tol dlaorela de vegnì a taié vigni veta de daurida y de tò pert a vigni manifestazions sacra y mondana "ladina", rati che la SVP ladina posse ence se la vaghé de paié zachei per scrive o almanco o per lascé traslaté si comunicac ofiziai per ladin: al se trata de n per de EUR. A s'audì Erwin Valentini"





L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=19