Les stries y i strions de Börz
Does edemes de vita da mont n pue autramenter con folclor y bal dles stries
Les prumes seires metudes a jì da la lia "Cultura da Mont" sun Börz (Antermeia) con ert, folclor y cultura, é stedes n plen suzes, enceben che pro la mostra d'ert alalergia él suzedù n fat desplajoul. Una na instalazion (metuda adum da wc's dl duo Michael Moling y Gustav Willeit) é vegnuda desdruta y spidiceda da "anonims" entratant la nuet dal venders a la sabeda. Al pèr che an ae bele afustié i malfatours che dess ester n clap de joegn da La Val. Chest fat ne à nia insciautrì i organisadours. Les seires jirà inant sciche programedes ence chest fin d'edema. La presidenta dl comité de organisazion Irsara Gaby con n paur da mont che se beiv n got de nida.