Dolomites sot a sconanza UNESCO
Data: 31 July 2009 da les 20:47:03
Tema: Politica



Festa a Auronzo per les Dolomites UNESCO

I ostiers se aspeta n bel reclam - Propostes per la senta tles valedes ladines: Ciastel Colz, Corvara y Plan de Gralba - Cortina d'Ampez da pert beluneisa - Albert Pizzinini: la cultura y l lingaz ladin se merita n respet tamben gran

La candidatura garateda dles Dolomites desche arpejon naturala UNESCO vegnirà festejeda ai 25 de aost a Auronzo (BL) con a la pert l president dla republica taliana, Giorgio Napolitano. Chesta novela é vegnuda deda do na reunion, ai 28 de messel tl Messner Mountain Museum sun l Monte Rite tl Beluneis, de raprejentanc dles cinch provinzies tochedes: Belun, Bulsan, Trent, Pordenon y Udin, che à laoré con suzes pro l projet de candidatura. Reinhold Messner à proponù de fé dles Dolomites n raion de spiza per cie che reverda n turism monejel tres la sconanza dl laour da paur. Sia proposta é ence chela de scluje i joufs per n valgunes ores al dì, da les 10.00 a les 17.00. Sun l Monte Rite (a Cibiana / Ciadoura), senta de sie museum, vuelel endere che an ti feje su n emplant portamont per conduje su la jent. Anter l auter àn spo ence rejoné dla doura dla merscia Unesco y de sie logo per realisé n sit dediché ai bens naturalistics dles Dolomites y cie strumenc de reclam adoré. Nia de definitif ne él depierpul per cie che reverda la senta dla fondazion UNESCO. L film ofizial dles provinzies realisé per la candidatura dles Dolomites à arpejon naturala dla UNESCO.
 



Da pert ladina él bele n valgunes propostes: l ombolt de Corvara, Franz Pedratscher, à proponù sie comun desche senta ideala, da pert dla Svp ladina y chela de Gherdeina en particolar, tres la ousc de Christoph Perathoner, él vegnù proponù la senta a Plan de Gralba tl ex-hotel Miramonti bele de proprieté dla provinzia de Bulsan y da restruturé aladò y da pert dla jonta y dl ombolt de Badia, Iaco Freinademez, él vegnù porté dant la proposta dl Ciastel de Colz a La Ila. La proprietara, Teresa Wieser, fossa enzaul desponuda a l dé ca per chest fin. Da pert beluneisa rejònen de Cortina d'Ampez, ence Col Santa Lùzia se à candidé. Bonamenter vegniràl realisé deplù sentes dezentralisedes con aminsitrazion a rodul, ajache deguna provinzia ne pò se permete de jì fora a mans vuetes.
Sun la chestion entervegn ence l president de Ladins Dolomites, Albert Pizzinini, che se damana che te chesta ocajion dess ester dut l material informatif, i envic y i comunicac ence dés fora per ladin. La popolazion ladina che abiteia da vedlamenter tl cuer dles Dolomites à debujegn de sconanza y de reconesciment almanco tant che les montes che la encertleia.






L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1801