Enseira tl Salf Pastoral sun envit dla Consulta
Data: 11 March 2003 da les 07:48:39
Tema: Politica


 

Willeit: "La proporzionala, na gran segurté per i Ladins - Deplù do l bujegn"

Enseira (10.03.2003) él vegnù adum sun envit dla Consulta Ladina dl Comun da Bulsan n pice clap de persones tl salf Pastoral a Bulsan per tò pert a la seira de informazion soura "l cuartier, i posc’ de laour, la formazion y la comunité ladina fora dles valedes". Dantfora les spligazions de Ludwig Kastlunger, colaboradour dl ufize Astat, soura l svilup demografich di ladins tla provinzia de Bulsan. Con la cumpeida dl 2001 l prum pice spavent, feter dlonch é i ladins jus zeruch, sie ti comuns ladins che ence foradecà, ence sce demé de puech, ma empò él n trend che an veid con n cert festide. A chesta tematica s'à atira dedò lié ite l vize-president dl Consei Regional y Provinzial Carlo Willeit y raprejentant ladin che à sotlinié l'importanza dla proporzionala per i ladins, ma proporzionala ne vuel nia dì che i ladins con si  za. 4,3 % ae ence demé debujegn de chest, p.ej. che al baste 4 menuc de televijion, o de "una na balota, depierpul che i talians y i todesc nen mangia 4". L statut de autonomia preveid tamben l criter dl debujegn, n criter che vegn endere apliché ingert da la maioranza. La materia dla proporzionala é deventeda oramai tant ampla che al é rie da ti sté do dlonch y da souravidlé che ala vegne ence dlonch aplicheda endretura. Per ejempl à la Lista LADINS cumpedé do che i ladins à dutaorela n credit pro l frabiché alesiré de 30 miliards dal 1972 al 1984. Chisc dess sen vegnì retus ai ladins con fic. Al vuel ester zachei che feje n control. Ence te Sudtirol nia dut or cie che lumina. Curta polemica a la fin.



Por i ladins é la proporzionala na gran segurté à dit Willeit, demé che ala messessa vegnì aplicheda plu giustamenter te sie confronc per ti permete ai ladins l azes ence olache con i numeri ne rùven nia. La maioranza podessa zenzauter avei la cherianza de fissé chest dert, sciche mesura de sconanza particolara per la mendranza ladina. Un n cont él ti tò demez zeche a chi che à le 96%, n auter ti tò demez a chi che à le 4,3%, l second é endere l caje, sce an pensa a les 4 comiscions legislatives (olache la Svp à sclut fora Willeit), al Comité per la RAI, a la comiscion dla toponomastica, a les comiscions paritetiches y en general dlonch olache al é presidenzes y vize-presidenzes. Willeit se à dagnora damané does vize-presidenzes a na maniera che una ti vegne deda a n ladin, na rejon nia conzeduda dai todesc y talians ai ladins. N svilup negatif méssen constaté tl fat che al vegn sposté for deplu sorvisc publics y con ei empera i posc' de laour fora dles valedes ladines: p.ej. l ofize de laour, l ofize di vicars de pesc, les strutures de previdenza y e.i. An essa a pora nia podù prevedei ofizes per les valedes ladines. Pro i posc' de laour publics méssen ence vedei la cualité.  Ence tl ciamp dla cultura ne bàstel nia tegnì ite la proporzionala: i ladins ne à degun raion de lingaz viadedò y mess se fé perchel dut enstesc. Perchel ài debujegn de deplù mesi finanziars.

L president dla LL Mischì Giovanni à sotlinié l'importanza per l grup linguistich ladin de avei strutures organisedes ence fora dles valedes ladines che laore sciche la Comunanza Ladina a Bulsan y la Consulta Ladina per crié na comunité. Al se trata de n laour dessegur nia dagnora saurì, ma con la motivazion de valgunes persones vala da arjonje truep sciche i fac desmostra. Importanta ence la prejenza dl ladin scrit a livel provinzial sun tofles y scrites, a desmostrazion che i ladins fej ence pert y che ai vegn touc en consciderazion. La seireda é vegnuda scluta via da na relazion dla raprejentanta tl Consei dl comun da Bulsan, Dolores Dariz, che à auzé fora l debujegn de cuartiers per i ladins à Bulsan. Ala à recordé les truepes ativités culturales, politiches y de aorela curta che é vegnudes enviedes via anter Comunanza y Consulta. Al volessa endò ester n flé nuef, ajache n cert stanciament ne é nia da souravedei, sce an confronteia i temps da encuei con i agn '80. Na oma, Walli Steiner Schmid d'Ansele, aciaseda a Bulsan à spo rejoné dles dificoltés dles omes ladines de ti dé inant a si mutons ence l lingaz ladin, sce al mancia entournvia n ambient che deide do. Mischi: ciuldì pa nia na sezion de scolina ladina ence a Bulsan tl davegnì? Inultima él ence intervegnù l assessour ladin Mussner Florian che ova apeina abù domesdì na enconteda inofiziala con la Lista LADINS deberieda con l vize-Svp Pepi Dejaco. Cotant fat "mel" l à l ton dles critiches en confront de sie operat y chel de sie assessorat, anter auter ence da pert de Mateo Taibon, redadour dla revista "Pogrom" dla "Lia Popui Manacés". La seira se essa prest sclut ju con na picera polemica. Ma, sciche Willeit à dit, apajan via: duc à na bocia da rejoné y valch un ence na pena critica da scrive, la liberté de informazion y esprescion dess vegnì respeteda. La politica y la democrazia viv ence de critiches y de informazion. (is).







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=180