Musical: l socret dl lech dl ergabuan
Data: 27 July 2009 da les 17:08:15
Tema: Fascia



L socret dl lech dl ergabuan

N teater musical con conties y cianties ladines ta Gardecia/Fascia ai 30 de messel y ai 20 de aost

Tl cheder dles manifestazions metudes a jì dal Istitut Cultural Ladin "Majon di Fascegn" y dal museo ladin de Fascia sot al titul "Isté 2009" él da mete a cuer l spetacul dal titul "L socret dl lech dl ergabuan", metù adum en colaborazion con l'assoziazion turistica de Fascia y programé per sies prumes does prejentazions i dis 30 de messel y 20 de aost 2009, da les 14.00, tla fopa enciantoula de Gardecia, damprò da la utia y con entournvia les pizes enciournentes dl Ciadenac.La vivana dl lech de Ergabuan. A man dreta: Fabio Chiocchetti, autour dles cianties.
 



L spetacul se desfila te na forma de teater musical, olàche contia, mujiga y ciant, fej la peia, na forma che à perauter raijes sotes (fones) tla tradizion fasciana, desche an pò ence vedei te na autra gran opera, "Laurin", de Luigi Canori, che é deventeda tres la verscion "lesiera" de Andrea Brunello con aranjamenc de Gianfranco Frisi, dret popolara.
Les mujighes originales de "L socret dl ergabuan" é de Gianfraco Grisi. Al vegn conté dles origines misteriouses dl "lech dl ergabuan" che é tla tradizion locala l lech de Ciareja (Carezza), conesciù lonch y lerch per sies eghes liciorentes. L autour, na conzescion al turism, conta la storia per talian depierpul che les cianties, de Fabio Chiocchetti, vegn portedes dant per ladin. Chiocchetti à entrecé liberamenter n valgunes dles conties ladines ambientedes entourn al Latemar con valch elemenc touc da la contia de Dino Buzzatti "Il segreto del Bosco vecchio".
La storia se la roda entourn a n amour nia coresponù de n strion dl vers dla vivana dl lech. Ala se entreceia spo con d'autres entravegnudes y recorda personajes y luesc sciche i morcs, i strions y i salvans, che unesc sies oujes te una na ciantia, les conties tradizionales con i temps moderns, crian a chesta moda n spetacul olàche al vegn desmostré sciche l lingaz y la tradizion ladina pò se mesuré con les formes nueves de esprescion artistica de encuei.
L spetacul vegn realisé da la assoziazion musicala "Neuma" de Mori, con Gianfranco Grisi al piano, conzertina y saltire, Elvio Solvetti a la chitara, Alessandro Boni con l mandolin y la chitara, Franco Giuliani sona l mandolin, l bouzouki y la chitara, Monica Modena l fablò y l fablò douc y Rossanna Caldini la vidola y la viola. L contastories é Maurizio de Zanghi, depierpul che la ousc feminila vegn empresteda da la joena ciantarina fasciana Noemi Iori de Delba.
Les mujighes y les cianties dl spetacul vegnirà coiudes adum te n CD dal titul "L lech, l boch y l ergabuan" che vegnirà dé fora tost dal Istitut Cultural Ladin "Majon di Fascegn".
Sce al essa da ester rie temp vegn l spetacul tegnì empò l medem dì, ma alternativamenter tl salf gran dl Istitut ladin, da les 17.30.






L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1798