Lites provinziales 2008: LADINS DOLOMITES
Data: 01 October 2008 da les 20:51:28
Tema: Politica



"Tegnon adum! per mané n raprejentant a Bulsan

I Ladins ne dess nia dagnora messei petlé, ma con LADINS DOLOMITES podei ghiré tla politica

"TEGNON ADUM", chest l slogan de LADINS DOLOMITES per chestes lites provinziales 2008. Enseira él vegnù tegnù a Bulsan la seconda enconteda publica fora dles valedes ladines. Trueps é stés i temesc portés tant y debatus. Ala ne sarà nia saurida, ma al và debujegn che i ladins mete dut sie peis tla politica per ne resté nia petleri eterns sciche Pepi Dejaco à dit y chi pò pa rejoné con na majera autorité che el che à vedù les pratiches politiches dla Svp dal daitefora.

COMENTAR

Dassen bona la imprescion sun la lista dl moviment „Ladins Dolomites” che se à prejenté enseira a Bulsan tla Ciasa Kolping. Propi n bel grup de joegn y de chisc à la maiour pert n titul universitar, ma souraldut n spirit de militanza per la mendranza ladina. Propi degun fanatism, ma idees y cotant de volonté de dé sie contribut a daidé mudé l “status” di ladins.




 

 


 

 


 


La lignola de problems tochés dij bele truep da soula: les mancianzes dl proporz fora dles valedes, la raprejentanza politica ingiusta di ladins tl Consei provinzial, la mancianza de raprejentanza tles comiscions autes, les scincondes ai ladins empede i mete a la pèr ti derc con i todesc y talians, l turism regolé dal aut empede ti lascé plu liberté a comuns, les ferides al ambient, l lingaz ladin lascé te n piz fora dles valedes, les comunicazions demé per todesch y talian, la descomparida, l'assimilazion di ladins fora dles valedes ence per mancianza de scolazion per ladin … Problems che à enteressé bendebot l publich che à fat cotantes domandes per avei sclarimenc. La discuscion é steda sarena y obietiva. Propi na bela seira. Enteressant recordé coche chest moviment nuef “Ladins Dolomites” sibe pié via do l referendum de chi da Souramont. Perchel vàn sen a lité tegnan cont di fredesc da Souramont che vuel vegnì con nos. Chestes lites à perchel n aspet ence dassen cultural per la reunificazion de duc i ladins con sies tradizions y la lista plu daverta te chest vers ai fredesc da Souramont é dessegur “Ladins Dolomites”. L liam politich-cultural deventa chilò fondamental. Demarevueia che la Generela, la Comunanza de Bulsan y sia Consulta ne dae nia na man a envié i sozes a tó pert a les manifestazions de prejentazion dla lista. N suzes dla lista fossa dessegur n vare inant tla vueia de unificazion. Dutes les unions culturales todesces ti dà na man a la SVP. A cie moda pa nia cheles ladines ai ladins?

(u.i.)

Adi Demetz: "Sce i volon mudé zeche, spo onse sen na gran ocajion y al é gran ora de mudé. Al ladins ti él vegnù fat dl 2003 endò truepes empermetudes p.ej. per cie che reverda la aplicazion plu elastica dles regoles dl proporz o de prejenza di ladins tles comiscions y tl TAR o l ampliament dles trasmiscions radio-tv ladines. Suzedù ne él te chisc ultims agn net nia. Sen él ora che i ladins ae l snait de tré su valch de nuef, ence per les generazions joenes." Al é en general n cert melcontent envers l aparat politich, che an ne sà avisa, sce al é na democrazia o na sort de monarchia con entournvia n grum che dij de scì y fata de plajeis y "poltrones" per chi dl partì. La ona de melcontent podessa chest iade ence rosedé sotissoura la Svp aladò de dutes les previjions litales y la fé jì sot al 50% dl consens.
Marco Pizzinini, portaousc de Amisc dla Ladinia, à dit che con l referendum da souramont se àl endespré fora l'anima ladina. Sun chesta ona él vegnù tout la dezijiion de mete en pe na lista deberieda con duc i ladins per arjonje 2 raprejentanc a Bulsan. Dant les lites végnel fat da duc i partis n grum de beles empromiscions, ma do les lites se desméntien tost via de dut. A pert sun la lista Svp ne à sun les autres listes degun candidat ladin na poscibelté concreta de vegnì lité. Ai funzioneia demé desche paissa per tré les oujes ladines. Ence perchel "TEGNON ADUM" y liton LADINS DOLOMITES. Marco Pizzinini: "Al é truepes cosses da fé, massa truepes cosses ne và nia ben tla provinzia de Bulsan per i ladins. A Bulsan él debujegn de n secont raprejentant ladin per mioré la situazion politica di ladins."
Ulrica Goller, capolista di Ladins, à fat alsavei a cie che ala ti darà n peis particolar: a la familia, al sozial y a la cultura, les trei seves de vigni sozieté.
Pepi Dejaco, secont capolista, à esponù che an é propi piés via con la campagna litala fora dles valedes ladines per demostré che LADINS DOLOMITES ne vuel nia demé operé tles valedes ladines. An vuel ence enstauré n liam nuef con i ladins che viv foradecà, n grumon, che podessa ester dezijifs per l suzes lital pro chestes veles. Ciodì dess pa i ladins lité LADINS DOLOMITES? Per Dejaco él cler, do sia longia esperienza pro la Svp: "Zenza na raprejentanza direta mess i ladins jì inant a petlé" y ne pò nia ghiré y tò pert al juech politich. I ladins ne dess nia se acontenté dla politica dles empermetudes dla Svp. Sciche an veid pro i ladins vegn dut dassen limité a valch ativité culturala y de aorela curta. Chest ne basta nia endere per tegnì en pe na mendranza che vuel souravive. I ladins à debujegn de na raprejentanza politica plu gaierda tl consei de Bulsan y i numeri rejona cler: te Sudtirol él 4,36% ladins aladò dla cumpeida dla jent, ma tl consei provinzial a Bulsan ései demé raprejentés con l 2,8%. "N secont raprejentant ladin à lerch y al é enfinamai n dovei l abiné ca", enscì Dejaco. LADINS DOLOMITES ne se tol nia demé dant de conduje plu adum, do l referendum da souramont, i ladins, ma vuel ence auzé sia ousc per i enteresc di ladins che viv foradecà a na moda che ai posse vive deplù sia ladinité ence fora dles valedes ladines.
"Valch seghita a dì: i ladins à pu bele dut": chest ne é nia veir, con i scioldi pòn ence sofoié ju les aspirazions legitimes de n majer reconesciment y de chel se tràtel pro i ladins. La situazion di ladins "dlafora" é vegnuda ilustreda dal candidat Paul Videsott che à splighé: "A Persenon él aladò de n stude universitar l 8,1% de cognoms ladins, ma de chisc se declareia demé l 1% sciche ladins, duc i autri à perdù l contat. Ciodì pa? Ciodì che ai ne pò nia vive la ladinité. Tles scoles todesces y talianes ne végnel feter iniò pité valch de ladin, nience sciche materia opzionala. Al é n dejenteres prest total encantourn y i ladins ne é pa extra-comunitars, ma prums vejins y viv te chesta tera da dagnora. L ejempl plu eclatant ultimamenter él che l Papa che é vegnù chest isté a Persenon à rejoné per todesch, talian y ladin, ma la onoranza che an ti à sourandé fova demé scrita per talian y todesch, na desmostrazion che les istituzions locales dlafora ne ti dà te chestes ocajions emportantes net degun peis y sostegn al ladin.

Te chesta situazion sarà n suzes lital de LADINS DOLOMITES na pera da cianton tla politica ladina, ajache dutes chestes chestions ruvarà sun meisa.

Les plates internet de LADINS DOLOMITES con deplù informazions: www.jentladina.org y www.ladins.biz







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1728