2. Fiera: Engiadina (CH), Tirol (A) y Auta Val Venuost (I)
Data: 03 March 2003 da les 18:00:30
Tema: Economia


 

Interregio 2003: I raions entourn l Pas dal Raisc se enconta

Dl 2003 vegniràl organisé la 3 Interregio a Graun. La fiera dess ti dé la poscibelté ai artejans, ai marciadenc y a l'economia turistica dles trei regions confinantes entourn l pas dl Raisc (Reschenpass) de prejenté sies prestazions y si servisc per l'economia locala. La pruma fiera fova vegnuda organiseda dl 2000 per emparé a se conesce y per promueve la cooperazion economica anter la Val Venuost, l Tirol/Sudtirol y l'Engiadina con la Val Mustair. Ala ova sciche aspet "L'inscunter tanter las trais regiuns" (per ladin-rumanc). La seconda Interregio de chesta outa arà l motto "Sainza cunfins". La conferenza stampa de prejentazion é vegnuda tegnida chisc dis a Graun. Duc i placac vegn tegnis trilings: talian, todesch y ladin-rumanc.



Chest ann vuelen mioré la cualité, les forzes inovatives di artejans, di marciadenc, di operadours turistics y di paurs y intensivé l'identificazion con l'idea dl'Europa. Na picera pert dl'auta Val Venuost rejona ciamò for ladin-rumanc, plu avisa tla Val Mustair che fej pert dla Svizra, autrò tla pert de Sudtirol s'à l lingaz destodé via tl 18eisem centené, ma pedies é dret da vedei tla toponomastica ciamò.

L'esposizion vegn endò organiseda sun n areal dlongia l paisc de Graun tl'auta Val Venuost, n luech che an arjonj l plu saurì y unfat asvelt da dutes les pertes. La lerch é grana assé y pieta en plu na beliscima veduda sun l lech blé omonim con l ciampanil dla vedla gliejia che spizola fora. L vedl paisc de Graun fova vegnù afonsé tl'ega dant da 50 agn canche an ova costruì la diga. De mei vegniràl prejenté l program tl detai.







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=167