Ciampedel à festejé i 50 agn de recostituzion dl comun
En juebia seira él vegnù prejenté 2 libri scric da Rasom Sabrina, un sun l paisc da Ciampedel y l auter sun i studafuech, entrami ti vegnirà partis fora a dutes les families
Al é vegnù tegnù en juebia, ai 13 de dezember 2007, a Ciampedel l'ultima sereda de na programazion longia de abinedes piedes via tl 2006 y sclutes ju ai 13 de dezember y che à abù desche motivazion i festejamenc per i 50 agn da canche Ciampedel à remetù su sie Comun autonom da Cianacei. Defat do l'enstaurazion dl rejim fascist de Benito Mussolini vegniva Ciampedel desche Comun lié permez a Cianacei y perdova sia ciasa de Comun y sie consei. Na situazion juda inant per passa 50 agn enfin a canche dl 1957 Ciampedel à endò podù avei sie Comun y Consei de Comun, despartis da Cianacei. L'aministrazion comunala videda dal capocomun Leonardo Bernard à dezidù per chest de porté dant n rich program de manifestazions che à duré doi agn y che se à sclut ju l'autra seira con n rich program tla sala dles adunanzes de Comun.
La ocajion fova souraldut la prejentazion de 2 libres scric da la dr. Rasom Sabrina, anter l'auter studiousa de lingac y bendebot conesciuda tl mond dl lingaz ladin. Un n liber rejona sun la storia de Ciampedel, la vita da zacan y di cincanta agn dla senta nueva de Comun, un auter sun la storia di studafuech volontadifs de Ciampedel che à tamben na longia storia y tradizion. L'autoura enstessa à rejoné sun co che al é nasciù chisc libri. Ala à desmostré na gran pascion y preparazion al ben dla storia locala y de sie paisc, Ciampedel. Entant la seira, coordineda dai assessours de Ciampedel Mariano Lollo y Antonio Iorio, él ence vegnù premié i vencidours dl concurs sun les faceres de legn metù a jì da l'aministrazion comunala. Les faceres pòn vedei dutaorela te sala grana de Comun. Na scomenciadiva plajoula tl segn dla valorisazion dl Carnascé fascian che à, desche an sà, na tradizion vedlora y che é bendebot emportanta tla vita soziala de Ciampedel. I libri vegnirà partis fora a dutes les families, na bela bambona per i sentadins de Ciampedel te chest Nadel 2007.
Domenico Volcan
