L Calender de Gherdeina 2008 enjigné da ruvé tles stues gherdeines
Vigni meis ti é vegnù dediché chesta outa a n mesc da paur - Les truepes bries viadò la publicazion
Per la Union di Ladins de Gherdeina él dagnora n gran laour ma tamben na bela sodesfazion a coordiné l Calender de Gherdeina. La publicazion é deventeda storica. Per trueps pascionés él for endò n onour podei publiché n articul tl calender che ruva te dutes les ciasedes de Gherdeina. L Calender à l fin de slarié fora tles ciases ligreza, informazion ma dantaldut recordanzes y cronica dla valeda.
L cuertl dl liber y l comité de redazion dl Calender de Gherdeina 2008 (cliché sun les fotos per vedei n format majer)
Deplù autours descriv ence te chesta edizion nueva te trueps articui, abelis con de beles fotografies, argomenc desvalifs y les entravegnudes popolares dl luech. Ades per chest vegn l calender scialdi aprijé da la jent de Gherdeina che viv davejin o dalonc da la valeda. L Calender é a chesta maniera ence n liam con l paisc da ciasa.
"Do belau n ann de laour y archirides sciche vigni ann", dij Egon Vinatzer, "é sen l Calender puech dan Nadel endò na ligreza". Vigni scrit, vigni reclam y vigni fotografia te chesta publicazion é original y deventarà tl temp storia documenteda. Tl Calender nuef pòn lieje documentazions y testemonianzes storiches enteressantes y dantaldut recordanzes de persones dla valeda. Propi chisc contribuc dla popolazion fej fora dl Calender na publicazion de valuta, popolara y damandeda. "Sce dut chest é meso a realisé, méssen ti sentì gra a duc chi che à daidé pera, manan ite articui o documentazions fotografiches", dij l president dla Union di Ladins de Gherdeina Egon Vinatzer.
Josef Runggaldier y Ingrid Runggaldier se à tout su la bria de cialé tres ortograficamenter l calender. Sie sostegn é bendebot emportant per ti garantì al Calender na viesta linguistica neta, clera y dantaldut dreta. L fin de chesta publicazion é ence chel de enraijé y tegnì ciauda la "coa" dla rejoneda dl’oma. La pert di meisc ti é vegnuda dedicheda ai luesc/mejes da paur te Gherdeina. Les fotografies é vegnudes sportes permez da Egon Senoner. L president, Egon Vinatzer "spera che la jent ae ence chest ann ligreza empera y che ala l tole ca vignitant per passé n valgunes ores de curtorela empera, ti embincian n bon ann 2008 de sarenité y pesc".
L Calender de Gherdeina 2008 vegn prejenté n vender ai 14 de dezember da les 20.00 tla biblioteca dla Cësa di Ladins. Per chesta ocajion sonaràl n grup dla Scola de Mujiga de Gherdeina.
