Dì dla Unité Ladina: na proposta nueva
Data: 08 July 2007 da les 22:52:21
Tema: Politica



Dì dla Unité Ladina, sen francamenter miec ai 14 de otober 2007

L ASSESSOUR REGIONAL LUIGI CHIOCCHETTI TI DÀ N SOSTEGN PLEN AL REFERENDUM - L COMITÉ DA SOURAMONT ADORA SPENULES

An conesc l laour ch’al é entourn per ti sté do a sensibilisé la jent al aveniment dl referendum. Comités de coordinament en él bele cotanc, nia demé ta Souramont, ma ence tla provinzia de Bulsan a mete man da chel de Mareo valgamia svilupé. N auter vegnirà metù su a Bulsan. L fin de duc chisc comités é samben chel de daidé garantí l suzes dl referendum sen ch’an sà l dí dla lita. L bel dla cossa é che les persones che laora pro chisc comités é scialdi joenes y ales dij zenza se daudé y se temei che ales à debujegn de dinés per podei fé n laour plu sistematich y de maiour convinzion. Ales se merita l sostegn finanziar, ajache l fin é cler y publich: n investiment a temp lonch per crié la Ladinia unida tres l suzes dl referendum.

 



"Ampez deida unì les Dolomites"
Reinhold Messner: i son mez ladin y mez sudtiroleis  - Ie son per n referendum - Les Dolomites é i creps plu biei dl mond
L referendum pò desdruje la utopia ladina
ma al pò ence ti dé na sburla forta a na comunanza nueva che nos conescion con l inom de Ladinia
Dì dla Unité Ladina: na ocajion arjumeda - La speranza é che la iniziativa vegne sourantouta da la Lia di comuns ladins
La Generela: al sarà ence nost dovei informé: la posizion 2 dis do l proclam dla data referendara, ai 28 de otober 2007
Fadies y spenules saràl pa ence do l referendum per porté tres y plu dant rejons nueves per giaté l "placet" da les regions, da les provinzies y dal Parlament de Roma. L troi é samben lonch y dassen ert, ma al é emportant ch’al reste inant l entusiasm y la vueia da se bate ence anter les dificoltés y valch vera perduda.

L dret problem é che les istituzions publiches, les unions se mueve deberieda con chisc comités y ne i lasce nia soui. Dessegur pòn dì che l assessour regional Luigi Chiocchetti ti dà n sostegn plen y el l dij ence francamenter, depierpul che l assessour provinzial, Florian Mussner, rejona dutaorela demé de separazion, de dificoltés imposcibles da superé tl cheder dl sistem scolastich, dl trilinguism y e.i. Chiocchetti à dit cler sie pensier en juebia domisdé a Urijei, al se à empegné dant la Generela. Chesta à empermetù a paroles sie sostegn tres l president, ma iniziatives concretes de sostegn enfin a sen degunes. Bonamenter vegniràl sposté, chest ann, l Dí dla Unité Ladina: dal 14 de messel al 21 de messel. Dantmesdì na santa messa per duc, y domesdì n "temp de clausura" per l Consei dla Generela. Bonamenter vegniràl ence realisé la proposta de mete l monument di Ladins te n auter post.

Francamenter él miec lascé ester la manifestazion preveduda per i 21 de messel y pensé a na gran manifestazion per l 14 de otober de chest ann, na manifestazion de sostegn al referendum y de "Benvegnus" a chi da Souramont. Per l meis de otober éles scialdi ruvedes les manifestazions dles unions fora per i paisc dles valedes y enscila podessa eles, sce enviedes endretura con n dialogh, tó pert y veramenter daidé organisé na gran manifestazion de solidarieté y deberieda con chi da souramont per dé n segn de volei sté adum. I ne podon nia nes empermete de perde na tel gran ocajion de ruvé endò adum. Al vuel ester valch de concret, n sclariment ofizial per ti fé vedei ite a la jent les dretes motivazions dl referendum y dla volonté de vegnì con Bulsan. Envié les dretes persones competentes a splighé la cossa dal cianton politich, giuridich, economich, linguistich y tradizional. I liams che nes lieia adum é n grumon, ma la jent mess podei i conesce. I comités per l referendum dess ejaminé la proposta dla manifestazion per l 14 de otober y dé sie contribut concret per la realisé. L jouf dl Sela dess endò deventé n gran pont de referiment. An dess spo pensé a fé vigni ann na tel manifestazion, per l dí dla bandiera, ai 5 de mei, envian ence les scoles a tó pert , per podei emparé a conesce la politica di Ladins desche grup etnich. Lascé tomé la manifestazion dl "Dì dla Unité ladina" é n segn de desfidenza totala tla autonomia di Ladins y de conseguenza te sia unité.

La Usc nes tira dant la critica a La Generela de avei lascé tomé l Dí dla Unité Ladina, depierpul, végnel dé da entene tla Usc che l president dla Generela à l merit dla Maratona dles Dolomites per desmostré ch’al é bon de realisé de gran cosses, canche nos dla redazion Noeles.net ne son bogn a nia. La Maratona é pieda via denant che valch un fossa president dla Generela y perchel ne à la Maratona nia da en fé con la Generela. La Maratona dles Dolomites é dessegur n gran aveniment sportif che ti fej onour a la Ladinia, organiseda deberieda con les aziendes dl turism y da n grumon de volontars y con l aiut di comuns. Samben tol ence pert i ostiers, i garnis y e.i, chi che à spo i maiours vantajes economics. Sce la Generela, per gauja dla Maratona, mess endere desdí si doveis, sies manifestazions, spo se stala scleta. Tant de membri dl Consei dla Generela fòvel pa anter i volontars dla Maratona? Nos on demé vedù l president vistí a la tiroleisa. (ji)

En resposta al nò al referendum da pert dl assessour Mussner:

"En chel di che i ladins azeteia zenza protesta la tripartizion politich-aministrativa arài sotescrit sia fin desche mendranza etnich-linguistica." (F. Calliari) 

 

SPENULES PER L REFERENDUM DE AMPEZ-COL-FODOM
I podeis paié ite al: Comitato promotore referendum per cambio Regione
Cassa Rurale e Artigiana di Cortina di Ampezzo
c/c 19902 - Abi: 8511 - Cab: 61070







L articul vegn da Noeles.net - Informazion ladina
http://www.noeles.net

L URL per chest articul é:
http://www.noeles.net/modules.php?name=News&file=article&sid=1543