Les lies da mont ladines: sun Peniola a Moena
LA SEZION DE AMPEZ NE À NIA TOUT PERT
Les Lies da mont Ladines se à abiné - desche al é tradizion - sun l meteman dl isté, en domenia ai 24 de jugn 2007. La enconteda vegn metuda a jì a rodul vigni ann te na valeda desvaliva per endrez de chesta o de chela sezion. Chest ann é la enconteda vegnuda tegnuda en domenia passeda y organiseda da la sezion dl CAI Sat Grup da Mont de Moena. Luegia de chesta enconteda plajoula él sté l bel "solé" de Peniola souravia Moena, n pice paisc de cater ciases, olàche n iade vivòvel 30 persones te trei families. Temps passés encuei.
Chilò se àn abiné. A Peniola soura Moena con la gliejiola dedicheda a San Jan Nepomucen.
Te una de chestes ciases él vegnù enjigné ite na bela ostaria "Malga Peniola" che enzaluda i sciors y la jent che vuel se giaude la fascinazion dla natura. Desche dagnora é truepes sezions ruvedes adalerch, enceben che te chesta sajon é trueps sozes pascionés di creps poester en vacanzes al mer con sies families. Al fova na gran raprejentanza dles trei sezions fascianes dl Alpeverein-Moena, Poza y Auta Fascia, n bel clap da Fodom y raprejentanzes da la Val Badia y da Gherdeina ca. Purempò deguna raprejentanza da Anpezo y chest él dessegur da moié, nia ajache an essa podù rejoné dl referendum, al ne fova nia la dreta senta, ma desche simbol de liam tres plu fon anter i ladins dl Venet con con chi dla region Trentin-Sudtirol. Dessegur na ocajion enjumeda. Via per l dì, dlongia a la bela messa te gliejia dedicheda a San Jan Nepomucen, protetour dles eghes, l salut dl capocomun de Moena Franceschetti Riccardo y chel dl president
dla sezion da Moena Domenico Sighel. Al é sté na ocajion per sté adum anter sozes dles lies da mont ligramenter te fradaia ence sce les ativités de truepes sezions é tres deplù sun la cherta con l grief problem de se tré do i joegn che ne desmostra nia tant de enteres envers a chestes assoziazions. Tlafineda podéssel ester problems de passé inant les ativités a les generazions plu joenes.
Domenico Volcan 
Liams a les plates internet:
