Max Castlunger y ensemble y Trio Gherdeina   

 

PRO LA FESTA POPOLARA VOLXFEST/A SUN I PRES DLA TALVERA EN VENDER Y EN SABEDA, AI 29 y 30 DE JUGN 2007

La Consulta Ladina dla zité de Bulsan tol pert chesta outa a la VOLXFEST/A sun i pres dla Talvera adum con la lia Tandem per ti fé conesce a la jent ence valch artist y talent musical dla Ladinia. La Volxfesta é na manifestazion de mujiga popolara che vegn bele tegnuda da n valgugn agn al scomenciament dla sajon ciauda per porté ite n sofl de aier fresch tla zité de Bulsan. Envié ite àla Max Castlunger con ensemble  y l Trio Gherdeina, does esprescions dret desvalives de mujiga, ma trames da la Ladinia. Max Castlunger (a man ciancia).

Sun i pres dla Talvera saràl da audì en vender, ai 29 de jugn 2007, da les 19.30, Max Castlunger adum con sie ensemble (Christian Pescosta y Marco Stagni) de strumenc a percuscion da la Val Badia (dret da consié sie sit: www.maxcastlunger.com) y en sabeda, ai 30 de jugn, tres da les 19.30, l Trio de Gherdeina, grup de mujiga popolara metù adum da Arnold y Oswald da Pertan y da Erich dl Schneider.
Max Castlunger é conesciù valgamia lonc y lerch desche percuscionist, nia demé a livel local, ajache al tol pert a n grum de projec y ativités de vigni jender musical. L ensemble Max Castlunger cuei su te sie repertore n grum de strumenc a percuscion che vegn sonés tl Brasil, tla Africa y tl Orient. L son di tamburlesc cherieia, desche an sà, na energia ligherzina y de bona vueia che lieia adum universalmenter.